پووختەی هەواڵەکە:

• دانوستانە ناڕاستەوخۆکانی نێوان واشنتن و تاران لە ڕێگەی قەتەرەوە پێشکەوتنی بەدەستنەهێناوە.

• هەردوولا بۆچوونیان وایە ئەگەری دەستپێکردنەوەی شەڕی سەربازی نزیک و چاوەڕوانکراوە.

• دۆناڵد ترەمپ ڕەتیدەکاتەوە لە بەرامبەر سازشی ئەتۆمی هیچ ئیمتیازێک بە تاران بدات.

• نێوەندگیرە هەرێمییەکان داوا لە ئێران دەکەن لە مەرجە ئەتۆمییەکانی پاشەکشە بکات.

---

گفتوگۆ ناڕاستەوخۆکانی نێوان ئەمریکا و ئێران بە نێوەندگیریی قەتەر لە نیویۆرک گەیشتوونەتە بنبەست، لە کاتێکدا نەرمی نەنواندنی هەردوولا ترسی دەستپێکردنەوەی پێکدادانی سەربازیی دوای هەڵبژاردنەکانی نیوەی خولی ئەمریکا زیاتر کردووە.

---

ماڵپەڕی ئەکسیۆس لە زاری سێ سەرچاوەی ئاگادار لە دانوستانەکان ئاشکرای کرد:

• هەوڵەکانی قەتەر بۆ کردنەوەی دەرچەیەکی دیپلۆماسی لەنێوان هەردوو وڵاتدا هیچ ئەنجامێکی بەدیاریکراوی نەبووە.

• هیچ کام لە لایەنە ناکۆکەکان ئامادە نین سازش لەسەر داواکارییە سەرەکییەکانیان بکەن.

• چەقبەستوویی دانوستانەکان وایکردووە هەردوولا دەستپێکردنەوەی جەنگ بە ئەگەرێکی زۆر نزیک بزانن.

• بەرپرسانی واشنتن پێیان وایە ئەمریکا باڵادەستە لە ململانێکەدا و پێویستی بە چارەسەری مامناوەند نییە.

• دۆناڵد ترەمپ لە پەیامێکدا ڕایگەیاند ئامادە نییە لە بەرامبەر پاشەکشەی ئەتۆمی هیچ شتێک پێشکەشی ئێران بکات.

مەرجەکانی ئێران و پەیامی بەرپرسانی تاران:

لە بەرامبەردا، ئێران جەخت دەکاتەوە کە تەنیا لە ئەگەری گەڕانەوەی ئەمریکا بۆ یاداشتی لێکتێگەیشتنی پێشوو ئامادەیە ڕێککەوتن بکات؛ هاوکات موحسین ڕەزایی، ئەمینداری ئەنجوومەنی ئاسایشی نەتەوەیی ئێران ڕایگەیاند کە وڵاتەکەی مەرجەکانی بۆ واشنتن ڕوونکردووەتەوە بەڵام سەرۆکی ئەمریکا توانای بڕیاردانی لە نێوان شەڕ و دانوستاندا لەدەستداوە، لە کاتێکدا نێوەندگیرەکانی دیکەی وەک پاکستان و میسر هانی تاران دەدەن سازش لە کەرتی ئەتۆمیدا بکات تا گەمارۆی دەریایی لەسەر بەندەرەکانی هەڵبگیرێت.

پێشینەی کۆبوونەوە دیپلۆماسییەکان لە نیویۆرک:

ئەم چەقبەستووییە دوای زنجیرەیەک دیداری چڕ دێت لە پەراوێزی کۆبوونەوەکانی نەتەوە یەکگرتووەکان، کە تێیدا عەلی سەوادی، نێوەندگیری قەتەری بە جیا لەگەڵ عەباس عێراقچی وەزیری دەرەوەی ئێران و شاندی باڵای ئەمریکا بە بەشداریی ستیڤ ویتکۆف، جارید کوشنەر و جەی دی ڤانس جێگری سەرۆکی ئەمریکا کۆبووەوە؛ سەرەڕای ئاماژە سەرەتاییەکان بۆ کەمکردنەوەی سزاکان، بەڵام هەڵوێستی نوێی ترەمپ تەواوی هەوڵە دیپلۆماسییەکانی بەرەو خاڵی سەرەتا گەڕاندەوە.

زانیاری زیاتر بۆ تۆ:

عێراقچی: چۆن بۆ شەڕ ئامادەین ئاوهاش بۆ دیپلۆماسی ئامادەین؛ مەرجەکانمان بۆ ئەمریکا لۆژیکین