یەکەم بارانبارینی ئەمساڵ لە هەرێمی کوردستان و عێراق دەستیپێکرد

پووختەى هەواڵەکە

یەکەم بارانبارینی ئەمساڵ لە هەرێمی کوردستان و عێراق دەستیپێکرد.
کەشناسی هەرێمی کوردستان: ئەمڕۆ بارانبارین بەشێوەی پچر پچڕ دەستپێدەکات.
کەشناسى عێراق: ئەو بارانە لە هەندێک شوێن و هەندێکجار هەورەبروسکەى لەگەڵدایە.
یەکەم بارانی ئەمساڵ لە عێراق لە ئەنبار و نەجەف بارى.

شەوی ڕابردوو لە ئەنبار بەتایبەتی لە ناوچە بیابانەکانی روتبە و قائیم ناوچە جیاجیاکانی شارەکە و بیابانەکانی سەماوە لێزمە باران و لە نەجەف نمە باران بەبایەکی بەهێزەوە باری و بەگوێرەی کەشناسەکان کاریگەری ئەو شەپۆلە دواتر هەرێمی کوردستان دەگرێتەوە.

کەشناسى هەرێمى کوردستان لە بارەى یەکەم باران چى دەڵێت؟

کەشناسی هەرێمی کوردستان: هۆکاری نزمبوونەوەی پلەکانی گەرما و بارانبارین، هاتنی نزمە پاڵەپەستۆی دەریای ناوەڕاستە.
کەشناسی: بارانبارین بەشێوەیەکی پچڕ پچڕ و مام ناوەند دەستپێدەکات.
سەرەتا لە سنووری پارێزگای دهۆک بارانبارین دەستپێدەکات.
پاشان درێژ دەبێتەوە بۆ ناوچە شاخاوییەکانی سنووری پارێزگای هەولێر.
پاشان بۆ کاتەکانی ئێوارە سنووری پارێزگای سلێمانی دەگرێتەوە بە شێوەی نمە باران، لەگەڵ زیادبوونی خێرایی با.
بە گوێرەی داتا تۆماركراوەكانی وێستگەی كەشناسی سلێمانی، لە مانگی ئەیلوولی ئەمساڵ نزمترین پلەی گەرمی 18.2 پلەی سیلیزی بووە.
بەرزترین پلەی گەرمی 39.4 پلە بووە.
تێكڕای پلەی گەرمی 28.9 بوو كە بەراورد بە تێكڕای پلەی گەرمی ساڵانەی مانگی ئەیلوول ئەمساڵ 0.1 پلە نزمترە.

کەشناسی عێراق دەشڵێت، لەمەودوا لە کاتەکانی شەو و بەرەبەیاندا پلەکانی گەرما سارد دەبێت، هەینیش ئەگەری باران بارینەکە بەردەوامی دەبێت بە تایبەتی لەناوچەکانی هەرێمی کوردستان و پلەکانی گەرما لەسەرانسەری وڵات دادەبەزێت.