وەزارەتی ناوخۆ درۆنی پێشکەوتووی بۆ بەرگریی شارستانی و هاتوچۆی هەولێر دابینکرد
کیژان مەحمود 45 خولەک پێش ئێستا
پووختەی هەواڵەکە
- درۆن و ئامێری پێشکەوتوو بۆ تیمەکانی بەرگریی شارستانیی هەولێر دابینکراوە
- هێمن میرانی: درۆنەکان سوودی بۆ کوژاندنەوەی ئاگر و هەڵگرتنەوەی مین هەیە
هێمن میرانی، بەڕێوەبەری گشتیی دیوانی وەزارەتی ناوخۆ، بە کەناڵ8ـى ڕاگەیاند، یەکێک لە درۆنەکان بۆ ئاگر کوژاندنەوە بەکاردێت و چوار کاتژمێر توانای فڕینی هەیە و دەتوانێت بۆ زیاتر لە سێ هەزار و 500 مەتر بەرزببێتەوە و 300 کیلۆگرام بار هەڵبگرێت، جگە لەوەی دەتوانێت بە سۆندە ئاو بۆ زیاتر لە سێ هەزار مەتر بەرز بکاتەوە.
توانای درۆنەکان
- درۆنەکە تواناى ڕزگارکردنى خەڵکیشى هەیە و دەتوانێت کەسێک هەڵبگرێت و بیگوازێتەوە بۆ شوێنێکى سەلامەت.
- درۆنی دووەمیش دەتوانێت 50 کیلۆگرام ماددەی پاودەر هەڵبگرێت.
- درۆنێکی دیکە بۆ بەڕێوەبەرایەتی هاتوچۆ دابینکراوە بۆ کۆنترۆڵکردن و ڕێکخستنی شەقامەکان، درۆنێکیش بۆ هەڵگرتنەوەی مین دابینکراوە.
تیمەکان ڕادەهێنرێت
بەڕێوەبەری گشتیی دیوانی وەزارەتی ناوخۆ گوتیشى، بۆ بەکارهێنانی درۆن و ئامێرەکان، ڕاهێنان بە تیمەکان کراوە و لە ئێستادا تەنیا بۆ پارێزگای هەولێر کڕدراوە و دواتر ئەگەر بارودۆخ ئاسایی بووەوە ئەوا بۆ شارەکانی دیکەش دەکڕدرێت و ڕاهێنان بە تیمەکانی بەرگریی شارستانی دەکرێت.
کیژان مەحمود
45 خولەک پێش ئێستا