پووختەى هەواڵەکە:

• وەزیرى دادى هەرێمى کوردستان نووسراوێکى لە مانگى ئابى ئەمساڵ، ئاڕاستەى وەزارەتى کار کردووە.
• بەگوێرەى بڕیارەکە بۆ گرێبەستى ئەلیکترۆنى بە نزیکەى پارەى ڕۆژێک لە کرێکار وەردەگیرێت.

---

لە نووسراوەکەى فەرسەت ئەحمەد، وەزیرى دادى حکومەتى کاربەڕێکەرى هەرێمى کوردستاندا هاتووە، گرێبەستى کارکردن لە نێوان کرێکارانى بیانى یان کرێکارى خۆماڵى لەگەڵ خاوەنکار، پێویستە لەلایەن فەرمانگەى کارى پەیوەندیدار پەسەند بکرێت و لە پاش ئەو ڕەزامەندییە ئاڕاستەى فەرمانگەکانى دادنووس دەکرێت و لەوێش پەسەند دەکرێت.

---

بەدواداچوونى کەناڵ8:

• ئەو کۆمپانیایەى کارى ئەلیکترۆنى عەریزەى فەرمانگەکانى دادنووسى دەکات، بڕێک پارە لە کرێکار لە بەرامبەر پەسەندکردنى گرێبەستەکەى و بەئەلیکترۆنیکردنى وەردەگرێت.
• پارەکە لە 15 هەزار دینارەوە دەستپێدەکات و لەناو فەرمانگەى دادنووسیش بڕێکى دیکە پارە وەردەگیرێت.
• ئەو پارەیەى بۆ کۆمپانیا وەردەگیرێت زیاترە لەو بڕە پارەیەى کە بۆ حکومەت وەردەگیرێت.

کەوتووەتە بوارى جێبەجێکردنەوە:

ئەم بڕیارە نوێیە و لە 30ـى ئابى ئەمساڵ لەلایەن وەزارەتى دادەوە دەرکراوە و ئاڕاستەى وەزارەتى کار و کاروبارى کۆمەڵایەتى و فەرمانگەکانى دادنووسى کردووە و چەند ڕۆژێکە کەوتووەتە بوارى جێبەجێکردنەوە.