پووختەی هەواڵەکە

• قوباد تاڵەبانی، جێگری سەرۆکوەزیران سەردانی قەزای کۆیەی کرد.
• لە یەکەم وێستگەی سەردانەکەیدا زانکۆی کۆیەی بەسەرکردەوە و لەگەڵ سەرۆک و ئەنجوومەنی زانکۆ کۆبووەوە.
• قوباد تاڵەبانی ڕاگەیاند، پشتگیری لە پڕۆژە داهێنەرەکان و پاراستنی ژینگە دەکەین

---

لە دەستپێکی سەردانەکەیدا قوباد تاڵەبانی، بەردی بناغەی پارکی"بەردی بناغە"ی لە هەواری زانکۆی کۆیە دانا کە بەبۆنەی یادی ٢٣ ساڵەی دامەزراندنی زانکۆکە بە هاوکاری دامەزراوەی سەرۆک مام جەلال دروست دەکرێت.

---

جێگری سەرۆکوەزیران لەگەڵ سەرۆک و ئەنجوومەنی زانکۆکە کۆبووەوە. سەرۆکایەتی زانکۆی کۆیە سوپاسی پشتیوانییە بەردەوامەکانی قوباد تاڵەبانیان کرد بۆ پێشخستنی زانکۆکە و بە تایبەتیش کە لەم دوایانەدا پاسی کارەبایی بۆ زانکۆ دابین کردووە.

پڕۆژە ناوازەکان

قوباد تاڵەبانیش لە کۆبوونەوەکەدا دڵخۆشی خۆی دەربڕی بەوەی هەر کاتێک سەردانی زانکۆی کۆیە دەکات گۆڕانکاری و پێشکەوتنی نوێ دەبینێت. دەستخۆشیشی لە سەرۆکایەتی زانکۆ و مامۆستایان و خوێندکارانی زانکۆکە کرد بۆ داهێنان و هەوڵە بەردەوامەکانیان بۆ خزمەتکردنی ژینگە. داواشیکرد، ئەو پڕۆژانەی هەیانە لە بوارەکانی ریسایکلین و بەکارهێنانی وزەی پاک و دابینکردنی کارەبا لە وزەی خۆر، زیاتر پەرەی پێ بدەن بۆ ئەوەی لە شارەکانی دیکەی کوردستان و عێراق سوودی لێ وەربگیرێت.

بەڵێنیشی پێدان بۆ لەمەودواش پشتیوانی هەموو هەوڵێک دەکات بۆ پێشخستنی زیاتری زانکۆی کۆیە، بە تایبەتیش پشتگیری لە پڕۆژە داهێنەرانەکانیان دەکات.