تەماتە بوو بە بار بەسەر جووتیارانەوە

پووختەى هەواڵەکە:

تەماتەى خۆمانە بازاڕی نییە و جووتیاران بۆیان ساغ ناکرێتەوە.
بەشێک لە جووتیاران بەرهەمی ئەمساڵیان فڕێ دەدەن.
کارگەى دۆشاوى تەماتەى شارەزوور بە هاناى جووتیارانەوە دەچێت.

ئەوەی بەسەر جووتیاراندا هاتووە کەس ئیرەى پێنابات، گەیشتوونەتە کۆتایی وەرز و تەماتەیەکی نایابیان بەرهەمهێناوە، شەپۆلی سەرماش گەیشتووە و دەبێت لەماوەیەکی کەمدا هەمووی بڕنن، بەڵام نازانن دوای ڕنینی بۆ کوێی بەرن و بە کێی بفرۆشن، وەک چارەسەرێکى کاتى، کارگەى دۆشاوى تەماتەى شارەزوور بڕیاریدا تەماتەى جووتیارانى پێنجوێن وەربگرێت.

بە گشتى ئەوەى بەسەر جووتیاران هاتووە:

بەرهەمەکانیان دەبەنە عەلووەکان بە ئەنقەست دەیانهێڵنەوە و بارەکانیان داناگیرێت.
نرخی شایستەیان پێنادرێت و بەنرخێکی زۆر هەرزان بەرهەمەکەیان لێوەردەگیرێت.

لایەنى پەیوەندیدار چى دەڵێت؟

ڕزگار حەمە خدر، ڕاوێژکاری وەزارەتی کشتوکاڵ و سەرچاوەکانی ئاو بە کەناڵ8ـی ڕاگەیاند " باجی سەر هاوردەکردنی تەماتە لە دەروازەکانەوە بەردەوامە، بەڵام زۆری بەرهەمی تەماتەی ئەمساڵ گرفتی بۆ جووتیاران دروستکردووە".

گوتیشی "سەرەڕای زۆریی بەرهەمی ناوخۆ و قەدەغەکردنی هاوردەکردنی، بەڵام لە بەشێک لە دەروازەکانی ناوەڕاست و خوارووی عێراقەوە ڕێگە بە هاوردەکردنی تەماتە دراوە".

کارگەى دۆشاوى تەماتەى شارەزوور دەرگاکەى دەکاتەوە

دواى ئەوەى دیمەنە ناخهەژێنەکانى جووتیارانى بینى کە تەماتەکەیان فڕێدەدەن و دەردەڵ دەکەن، کامەران هەورامى، خاوەنى کارگەى دۆشاوى تەماتەى شارەزوور لە شارى هەڵەبجە لە کۆنفرانسێکى ڕۆژنامەوانیدا ئامادەیى خۆى بۆ وەرگرتنى تەماتەى جووتیارانى پێنجوین دەربڕى.

خاوەنى کارگەى دۆشاوى تەماتەى شارەزوور:

وەرزى تەماتە نەماوە، بەڵام دووبارە کارگەکەمان بەگەڕخستووەتەوە.
نامانەوێت ڕەنجى ساڵێکى جووتیارانى پێنجوێن بەفیڕۆ بچێت.
نرخى دۆشاوى تەماتەش بەجێگیرى دەهێڵینەوە.
بەنرخێکى گونجاو تەماتە لە جووتیاران وەردەگرینەوە.
ڕۆژانە تواناى وەرگرتنى زیاتر لە دوو تۆن تەماتەمان هەیە.

بەرهەمى تەماتە لە هەرێمى کوردستان:

جووتیاران ڕۆژانە بڕی 700 تۆن تەماتە دەخەنە بازاڕەکانەوە.
لە مانگێكدا 21 تۆن و لە حەوت مانگی پێگەیشتنی تەماتەدا بە گشتیی 250 بۆ 300 هەزار تۆن بەرهەمدەهێنرێت.
پێویستیی ڕۆژانە 500 بۆ 600 تۆنە و مانگانە دەگاتە 15 بۆ 18 هەزار تۆن.

بەرهەمی تەماتە لە هەرێمی کوردستان لە مانگی ئایار تاوەکو ناوەڕاستی مانگی 11 پێدەگات و دەخرێتە بازاڕەکانەوە، لە مانگی 10ـەوە تەماتەی ناوچەکانی سۆران و چۆمان و پێنجوێن پێگەیشتووە.

زانیاریى زیاتر بۆ تۆ:

وەرزی چنینەوەی تەماتەی پێنجوێن و کێبڕکێی گەنجان لە بارکردنیدا