پووختەى هەواڵەکە

• دووەمین ڕۆژى دیدارى مێرى بەردەوامە.
• لە پانێڵێکدا ئەحمەد موفتى قسەى لەبارەى کەرتى غاز کرد.
• بە گوتەى موفتى کەرتى غازى هەرێمى کوردستان گەشەى گەورەى کردووە.

---

ئەحمەد موفتى بریکارى وەزارەتى سامانە سروشتییەکان لە پانێڵی بەهێزکردنی ئایندەی هەرێمی کوردستان، چەند پرسێکى گرنگى لەبارەى غاز، نەوت و بەنزینەوە شیکردەوە.

---

قسەکانى ئەحمەد موفتى لەبارەى غازەوە:

• لە بودجەی عێراقدا خشتەیەک هەیە ساڵانە بڕی 200 بۆ 250 ملیۆن دۆلار بۆ وەبەرهێنان لە کەرتی وزەدا تەرخان دەکرێت.
•  هەرێمی کوردستان هیچ تەرخانکراوێکی لەوجۆرەی نییە و سفرە.
• هەرێمی کوردستان بە پارەی وەبەرهێنانی بیانی گەشە بەکەرتى غاز دەدات، هەر لەبەر ئەوەشە سەرجەم گرێبەستەکان پێیان دەگوترێت گرێبەستی هاوبەش.
•  عێراق بە هەرێمی کوردستانەوە 3 هەزار ملیۆن مەتر پێ سێجا گاز بەرهەم دەهێنێت، زیاتر لە 35%ـی کۆی گازی هەموو عێراق لە هەرێمی کوردستانەوە بەرهەمدەهێنرێت.
• ئێستا عێراق 500 ملیۆن مەتر پێ سێجا لە ڕۆژێکدا لە تورکمانستانەوە بە گازی شل (LNG) هاوردە دەکات لە ئێرانیشەوە هاوردە دەکات.
• بۆ کارەبای 24 کاتژمێریی، عێراق پێویستی بە 8 ملیار مەتر پێ سێجایە.
• هەرێمی کوردستان توانیویەتی پێشکەوتنی بەرچاو لە بەرهەمهێنانى غاز بەدەستبهێنێت.
• لە ساڵی 2020دا بەرهەمهێنانمان 350 ملیۆن مەتر پێ سێجا بوو لە ڕۆژێکدا، بەڵام ئێستا تەنیا لە کۆرمۆر گەیشتووینەتە 750 ملیۆن.
• بە کۆی گشتیی بەرهەمی هەرێمی کوردستان لە 900 تاوەکو 1000 ملیۆن مەتر پێ سێجایە.

بەنزین و پێداویستییەکانى هەرێمى کوردستان لە زارى ئەحمەد موفتییەوە:

• هەرێمى کوردستان ڕۆژانە پێویستى بە نزیکەى شەش ملیۆن لیتر بەنزین هەیە.
• نزیکەى چوار و نیو بۆ پێنج ملیۆن لیتر بەنزین بە بازرگانى دابیندەکرێت.
• توانیومانە پاڵپشتى بەنزین بکەین و لیترێک بەنزین بە 750 دینار دابەشبکرێت.
• ڕێگاى دووەم و سێیەم ئەوەیە بەغداد 50 هەزار بەرمیل نەوتى خاوت لێ وەربگرێت بەنزینەکەمان بۆ دابین بکات، یاخود گلدانەوەى نەوتى خاو زیاد بکات بۆ هەرێمى کوردستان.

ئەحمەد موفتى لە گوتەکانیدا  کەمى بەنزین و قەیرانى سووتەمەنى، بۆ داخستنى گەرووى هوورمز گەڕاندەوە کە ئەو بە"تاى" گەرووى هوورمز ناویبرد و گوتى "گەیشتووەتە هەموو شوێنێک و تەنیا هەرێمى کوردستان نییە".

سەرنجى ئەحمەد موفتى لەبارەى وەزارەتى نەوتى عێراقەوە:

• پێویستە ناوی وەزارەتی نەوتى عێراق بگۆڕێت بۆ ناوی وەزارەتی نەوت و غاز، چونکە وەبەرهێنان لە غازدا زیادیکردووە.
• وەزارەتى نەوتى عێراق لە ساڵى 2023 ژمارەى کادرەکانى 30 هەزار بووەو ڕۆژانە سێ ملیۆن بەرمیل نەوتى خاوى بەرهەمهێناوە.
• ئێستا وەزارەتى نەوت نزیکەى 200 هەزار کادرى هەیەو تەنیا یەک ملیۆن بەرمیل نەوتى زیاد کردووە.