سەلام تاهیر

دوای شکستە گەورەکەی هەڵبژاردەی تۆپی پێی تازەپێگەیشتوانی کچانی عێراق لە پاڵەوانێتی جامی ئاسیا ،

دروستکردنی ستراتیژییەکی درێژخایەن و بنەڕەتی تاکە ڕێگەیە بۆ بونیادنانەوەی هەڵبژاردەیەکی بەهێز .
یەکێتی تۆپی پێی عێراق و لیژنەی ئافرەتان دەبێت لە جیاتی چارەسەری کاتی، دەست بکات بە چاکسازیی بنەڕەتی .
​ ئەویش بە کارکردن بۆ سەرکەوتنی تۆپی پێی کچان کە بریتین لە :
​۱. دروستکردنی فێرگەی تایبەتمەند بۆتەمەنەکانی ( ٥ تا ۱۲ساڵ ) ،
ناکرێت یاریزان تەنها پێش پاڵەوانێتییەکان کۆبکرێتەوە . دەبێت فێرگەی فەرمی لە سەرجەم پارێزگاکان بەدیاریکراوی بۆ کچانی منداڵ و تازەپێگەیشتوو بکرێنەوە .
​کردنەوەی خولی قوتابخانەکان : هاوکاری لەگەڵ وەزارەتی پەروەردە بۆ بەڕێوەبردنی پاڵەوانێتیی بەردەوامی کچان لە ئاستی قوتابخانە بنەڕەتی و ئامادەیییەکان .
​۲. دابینکردنی ژێرخانی سەربەخۆ و شایستە :
یاریگا و کاتی مەشقکردنی تایبەت:
دابینکردنی کات و یاریگای گونجاو لە کاتژمێرە گونجاوەکاندا (نەک کاتی گەرما یان کاتی نەگونجاو) بۆ ئەوەی فێرگەکان بتوانن بە شێوازێکی بێوچان و بێ ئاستەنگ ڕاهێنان بکەن .
​داهات و پاڵپشتی دارایی : تەرخانکردنی بودجەیەکی تایبەت و ڕاستەوخۆ بۆ تۆپی پێی کچان ، تا یانەکان هان بدرێن تیپی کچان ببنە خاوەنی کەلوپەل و پێداویستیی شایستە .
​۳. گەشەپێدانی کادیرانی ڕاهێنەرایەتی ئاسیایی و ناوبژیوانی
​ وبەرزکردنەوەی ئاستی ڕاهێنەران:
ڕێکخستنی خولی ڕاهێنەرایەتی (C, B, A) بۆ ئافرەتان بۆ ئەوەی ڕاهێنەری شارەزا و خاوەن بڕوانامە سەرپەرشتی یاریزانانی تازەپێگەیشتووان بکەن.
​پەروەردەکردنی ڕاهێنەری توانای جەستەیی و دەروونی:
تەنها لایەنی تەکتیکی بەس نیە ، یاریزانانی تازەپێگەیشتوان پێویستیان بە ئامادەکاری جەستەیی و خۆراكی دروست و بەهێزکردنی ئیرادەی دەروونی هەیە .
​٤. خولی بەردەوام بۆ ئاستە تەمەنییەکان :
​خولی فەرمی بۆ تەمەنەکانی U-15 و U-17 :
پەرەپێدانی خولێکی بەردەوام کە بە لانی کەمەوە ٦ تا ٨ مانگ لە ساڵێکدا کارا بێت ، تا یاریزانان لە ڕیتمی یاری پێشبڕکێ دا بمێنێنەوە .
​
​٥. دروستکردنی کەشوهەوایەک بۆ پشتگیری کۆمەڵایەتی :
​هۆشیارکردنەوەی بنەماڵەکان : هاندانی خێزانەکان و ڕوونكردنەوەی سوودەکانی وەرزش بۆ کچەکانیان ، بە مەبەستی ڕەواندنەوەی تەواوی ڕێگرییە کۆمەڵایەتییەکان .
​میدیا و ڕاگەیاندن :
دروستکردنی ڕووماڵی میدیایی گونجاو بۆ پیشاندانی سەرکەوتنەکانی کچان و بەرزکردنەوەی ورەی تیپەکان.
​شکست لە ئاستی تازەپێگەیشتوان دا دەکرێت ببێتە خاڵی وەرچەرخان ، بەو مەرجەی یەکێتی تۆپی پێی عێراق و و لیژنەی ئافرەتان بە دیدگایەکی زانستی، دوور لە بڕیاری سۆزداری و بە پلانی درێژخایەنی ٤ تا ٦ ساڵ کار بکەن و دور بکەونەوە لە لە خاتر و خۆتر لە هەڵبژاردنی یاریزانان دا کە ئەمە زۆرترین کاریگەری هەبوو لەسەر ئاستی هەڵبژاردەکە و دور بکەونەوە لە ناوی زل و هەڵنەخەڵەتێن بە یاریزانی پیشەگەر تا نەچنە بنج و بناوانی .