پووختەی هەواڵەکە

• تورکیا: چالاکییەکانی گەڕان بەدوای نەوت و گازی سروشتیدا لەسەرانسەری وڵاتەکە لە وشکانی و دەریادا بەردەوامن.
• ئاڵپارسڵان بایراکتار دەڵێت، دەمانەوێت بۆریی نەوتی نێوان تورکیا و عێراق بە تەواوی توانایەوە کار بکات

---

ئاڵپارسڵان بایراکتار، وەزیری وزە و سەرچاوە سروشتییەکانی تورکیا لە پەراوێزی هەفتەی وزەی ڕووسیا لە موسکۆ ڕایگەیاند، چالاکییەکانی گەڕان بەدوای نەوت و گازدا لە دەریادا و لەسەر زەوی بەردەوامن. ئاماژەی بەوەش کرد کە بەرهەمهێنانی نەوت لە گابار بەشێکی گرنگی ئەم کارانەیە و لە ئایندەیەکی نزیکدا مژدەی دۆزینەوەی نوێ لەو کێڵگەیە ڕادەگەیەنن.

---

وەزیری وزە و سەرچاوە سروشتییەکانی تورکیا:

• بەرهەمهێنانی گازی سروشتی لە کێڵگەی ساکاریا لە دەریای ڕەش تا ساڵی 2028 بۆ چوار هێندە زیاد دەکەن.
• کارکردنی بۆرییەکانی نەوت و گازی وەک تاناپ کە لە ئازەربایجانەوە بە تورکیادا بۆ ئەوروپا درێژ دەبێتەوە بەردەوامە.
• هێڵی باکو-تبلیسی-جەیهان و بۆریی نەوتی نێوان عێراق و تورکیا بە تەواوی تواناوە، سوودی گەورە بە وڵاتانی بەرهەمهێنەر و بەکاربەر دەگەیێنێت.

لەبارەی هاوکارییەکانیان لەگەڵ ڕووسیا لەبواری وزەدا، ئاڵپارسڵان بایراکتار ئاماژەی بەوەکرد کارەکانی یەکەم ڕیاکتۆری وێستگەی ئەتۆمی ئاککویو نزیکبوونەتەوە لە کۆتایی و لە چەند مانگی داهاتوودا دەست بە بەرهەمهێنانی کارەبا دەکات.