پووختەى ڕاپۆرتەکە

• گوڵزار ژنێکى دانیشتوى گوندى تەوەکەڵە لە شارەدێى ئاغجەلەر لە شارۆچکەى چەمچەماڵ.
• تەمەنى گوڵزار گەیشتووەتە 65 ساڵ.
• بۆ یەکەمجار لە ژیانیدا هەوڵدەدات خوێندنەوە و نووسین فێرببێت.

---

کاتێک تەمەنی گەیشتووەتە شەست و پێنج خەزان، لە پۆلێکی گوندەکەیدا ژنێک بە ناوی گوڵزار، مێژوویەکی نوێ بۆ سپێتی کاغەزەکان دەنووسێتەوە، دەیسەلمێنێت کە مۆمی فێربوون لە هیچ کڕێوە و زریانێکی تەمەندا خامۆش نابێت.

---

شۆڕشێک دژ بە ساڵانێک بێدەنگى

• تەنیا دەنگی پۆلێک نییە بەڵکو ترپەی لێدانی دڵێکە.
• دوای نیو سەدە بە بێدەنگی زمان دەگرێت.
• بە دەنگی گەرمی مامۆستا و خشپەی ناسکی قەڵەم.
• هەر وانەیەک دەکەنە سەفەرێک بۆ ناو دونیای نوسین و خوێندنەوە.
• گوڵزارى تەمەن 65 ساڵە بۆ یەکەمجارە خەتی پێنووسەکەی خستۆتەکار.
• ئەو ناو و وشانەی ساڵانێک بوو تەنیا لە سنگیدا دەنگیان دەدایەوە، ئێستا لەسەر کاغەز ڕەگ دادەکوتن.
• ڕێگەی گوڵزار هێشتا درێژە، ئەو لە قۆناغی دووەمی ئەم سەفەرەدایە.
• ئەو ڕۆژەی پێنووسەکەی هێناو ناوی خۆی نووسی.
• تەنیا ناوێکی نەنووسی بەڵکو دەرگایەکی گەورەی بەڕووی ڕووناکیدا واڵاکرد.
• گۆڕانکارییە مەزنەکانی ژیان، هەمیشە بە وشەیەکی سادە دەست پێ دەکەن.
• وشەیەک کە مرۆڤ خۆی دەینووسێت، خۆی دەیخوێنێتەوە و خۆی دەبێتە خاوەنی.
• ماوەی پێنج مانگە گوڵزار ئێواران پێش خۆرئاوابوون خۆى بۆ ڕۆژێکی نوێ ئامادە دەکات.
• ئامادەکارییەکانى گوڵزار بۆ بڕوانامە نیە، بەڵکو بۆ ڕزگاربوونە لە کۆت و بەندەکانی نەخوێندەواری.

ئەم کارە ڕێکخراوی هاواری گەڵا بە هاوکاری ڕێکخراوى وادی ئەڵمانی لە گوندەکانی سنوری شارەدێى ئاغجەلەر درێژەی پێدەدەن.

ئەم ژنانە بە خوێندنی کوردی و بیرکاری دەرگاکانی فێربوون بەڕووی خۆیاندا واڵادەکەن، لێرەوە بەرەو جیهانە فراوانەکەی دیکە کە فێربوونی زانست و زانیاریی و خوێندنەوەی بەردەوامە درێژە بەو کاروانە دەدەن کە ئێستا لە سەرەتای رێگاکەدان.