مەترسیی داڕمانی بەشێک لە پردەکانی شارباژێڕ هەیە
کەناڵ8 2 کاتژمێر پێش ئێستا
پووختەى ڕاپۆرتەکە:
- زستان نزیکبووەتەوە و دانیشتووانى ناوچەکە ترسیان هەیە.
- ئیدارەی ناوچەکە چەندین جار داوای نۆژەنکردنەوەی پردەکانی لە حکومەت کردووە.
- حکومەت بە بیانووی قەیرانی دارایی وەڵامی داواکارییەکان ناداتەوە.
لەگەڵ نزیکبوونەوەی وەرزی بارانبارین و زستان، دانیشتووانی ناوچەی شارباژێڕ بەهۆى کۆنى پردەکانەوە لە بەردەم مەترسییەکی گەورەدان، سەرەڕای هۆشداریی بەردەوامی بەرپرسان، بەڵام وەڵامی حکومەتی هەرێمى کوردستان هەر ئەمەیە کە دەڵێت "قەیرانی داراییە و پارە نییە".
شارباژێڕ:
- ناوچەیەکی شاخاوی و گرنگى پارێزگای سلێمانییە.
- گوند و شارۆچکەکانی لە ڕێگەی چەندین پردەوە بە یەکەوە دەبەسترێنەوە.
- تەمەنی بەشێک لە پردەکان هەشتا ساڵ دەبێت.
- کۆنبوون و نۆژەننەکردنەوە وایکردووە هێزی مانەوەیان لەدەستبدەن.
- ئیدارەی ناوچەکە چەندین نووسراوی بەرزکردووەتەوە بەڵام وەڵامی بۆ چارەسەری کێشەی 10پرد وەرنەگرتووە.
- لەگەڵ یەکەم شەپۆلی بەهێزی بارانبارین مەترسی ڕووخانی یەکجاریی ئەم پردانە لە ئارادایە.
کات خێرا تێپەڕ دەبێت و هەرێمى کوردستان لەناو وەرزی بارانباریندایە، پرسیارەکە لای خەڵکی ناوچەکە ئەوەیە: ئایا حکومەت چاوەڕێ دەکات کارەساتێک ڕووبدات و پردەکان بڕوخێن تاوەکو بودجەی فریاکەوتنیان بۆ دابینبکات، یاخود پێش ئەوەى کار لە کار بترازێت فریا دەکەوێت؟
کەناڵ8
2 کاتژمێر پێش ئێستا