وەزارەتی تەندروستی لە کەرتى غەززە رایگەیاند، بەهۆی بۆردمانەکانی ئیسرائیلەوە ژمارەی کوژراوانی كەرتەكە گەیشتووەتە نزیکەى 16 هەزار کەس.

لەراگەیاندراوێکدا کە وەزارەتەکە بڵاویکردووەتەوە، ژمارەى کوژراوانى کەرتەکە بەرزبووەتەوە بۆ 15 هەزار و 899 کەس، 70%ی کوژراوەکان ژن و منداڵن، هەر بەگوێرەى ئامارەکانى وەزارەتى تەندروستیی غەززە، ژمارەی بریندارەکان گەیشتووەتە 42 هەزار کەس.

لەلایەکی دیکەوە نووسینگەی سەرۆکوەزیرانی ئیسرائیل ئاشكرایكرد، ژمارەی کوژراوانی بارمتەکان زیاتربووە و بەمەش کۆی ئەو بارمتانەی لەلایەن بزووتنەوەی حەماسەوە کوژراون گەیشتوونەتە 15 کەس.

نووسینگەکە روونیشیكردووەتەوە، ئەو بارمتانەی کوژراون 11 کەسی هاوڵاتی سڤیل و چواریان سەربازی ئیسرائیلی بوون، یەکێکیان فەرماندەیەکی باڵابووە، بەبێ خستنەڕووی زانیاریی زیاتر.

ئەوەش لەكاتێكدایە، بزووتنەوەی حەماس پێشووتر رایگەیاندبوو: "بارمتەکان بەهۆی بۆردوومانەکانی ئیسرائیلەوە کوژراون".

24ی تشرینی دووەمی ئەمساڵ، ئیسرائیل و حەماس بە نێوەندگیریی قەتەر،میسر و ئەمریکا ئاگربەستی کاتییان راگەیاند، حەماس 80 بارمتەی ئیسرائیلی و ئیسرائیلیش سێ هێندەی ئەم ژمارەیەى لە گیراوانى فەڵەستین ئازادکرد، هاوکات 137 بارمتەی ئیسرائیلی لەلای حەماس ماون.