مۆمی گوێ ماددەیەکی سروشتی و بەسوودە کە لەلایەن رژێنەکانی ناو گوێوە دەردەدرێت، گوێ پاکدەکاتەوە و لە تۆز و خۆڵ و هەوکردن دەیپارێزێت. هەرچەندە چەندین سوودی هەیە، بەڵام ئەگەر بڕێکی زۆر دەربدرێت، دەکر‌ێت ببێتەهۆی گیرانی گوێ و هەندێک گرفت دروستبکات.

هۆکاری گیرانی گوێ بەهۆی مۆمەوە چییە؟

هەندێک کەس بە سروشتی مۆمی گوێیان لە کەسانی دیکە زیاترە و ئەمەش وادەکات گوێیان بگیرێت، ئەم خاڵانەی خوارەوەش مەترسیی گرفتەکە زیاددەکەن:

• بوونی مۆمی وشک لە گوێدا
• بوونی مووی زۆر لە گوێدا
• تەسکیی رێڕەوی گوێ
• بەکارهێنانی زۆری بیستۆکی گوێ
• بەکارهێنانی پاککەرەوەی گوێ

نیشانەکانی گیرانی گوێ بەهۆی مۆمەوە چین؟

• ئازاری گوێ
• لەدەستدانی بیستن
• زرنگانەوەی گوێ
• هەستکردن بە پڕیی ناو گوێ
• خورانی گوێ
• هاتنەدەرەوەی شلە یان کێم لە گوێوە
• سەرگێژخواردن

لەکاتی هەبوونی ئەم نیشانانەدا پێویستە کەسەکە دەستبەجێ سەردانی پزیشک بکات:

• تا
• ئازاری بەردەوامی گوێ
• هاتنەدەرەوەی شلە لە گوێوە
• بوونی بۆنێکی ناخۆش کە لە گوێوە دێت

ئەگەر گرفتەکە چارەسەرنەکرێت چی روودەدات؟

لەکاتی پشتگوێخستنی گرفتەکە، نیشانەکانی گیرانی گوێ، بۆ نموونە لەدەستدانی بیستن و گوێزرنگانەوە، خراپتردەبن، ئەمانەش هەموویان کەسەکە بێزاردەکەن و دەکرێت ژیانی رۆژانەی لێتێکبدەن.

گرفتەکە چۆن دەستنیشاندەکرێت؟

ئەو کەسانەی گرفتەکەیان هەیە پێویستە سەردانی پزیشكی پسپۆری قوڕگ و لووت و گوێ بکەن، پزیشکەکە لەرێگەی بەکارهێنانی گوێبین(ئۆتۆسکۆپ)ەوە، گوێی چارەخواز دەپشکنێت و گرفتەکەی دەستنیشاندەکات.

گرفتەکە چۆن چارەسەردەکرێت؟

دەکرێت گرفتەکە لە ماڵەوە یان لە کلینیکێکی پزیشکی چارەسەربکرێت، چارەسەرەکان ئەمانەن:

• بەکارهێنانی دڵۆپی پاککەرەوە: وەکو دڵۆپی سەیلین یان گلیسرین، ئەم دەرمانانە چارەخواز خۆی بەکاریاندەهێنێت، چەند دڵۆپێک دەکاتە گوێی کە مۆمی گوێ شیدەکەنەوە و بەوشێوەیە مۆمەکە ئاسانتر دێتەدەرەوە. پسپۆڕان دەڵێن نابێت پاککەرەوە یان کلینێکس بۆ ناو گوێ بەکاربهێنرێت، چونکە دەکرێت زیان بە پەردەی گوێ بگەیەنێت، هەروەها وادەکات رژێنەکان زیاتر مۆم دەربدەن.
• پاککردنەوە بە ئاو: لەرێگەی سرنجێکی تایبەتەوە دەکرێت، باشترە پێش ئەوە دڵۆپێک بۆ نەرمکردنەوەی مۆمەکە بەکاربهێنرێت.
• لابردنی مۆمی گوێ لای پزیشک: پزیشکی پسپۆڕ لەرێگەی بەکارهێنانی ئامێری تایبەتەوە مۆمەکە لادەبات، زۆرینەی جارەکان لابردنی مۆمی گوێ کاتێکی کەم دەخایەنێت.

لەکاتی هەبوونی گرفتەکە پێویستە چی نەکرێت؟

هەندێک بەرهەم و ئامێر لە شوێنە نافەرمییەکان دەفرۆشرێن کە دەکرێت زیان بە پەردەی گوێ بگەیەنن. پسپۆڕانی بواری قوڕگ و لووت و گوێ تاوەکو ئێستا تەنیا ئەو سێ رێگەیەی سەرەوە پێشنیازدەکەن، ئەوان دەڵێن هەموو ئەو ئامێر و کەرەستانەی دیکە کە رێکلامیان بۆ دەکرێت بە کاریگەر دانانرێن و دەکرێت زیانیان هەبێت.