مەراسیمی کردنەوەی نوسینگه‌ی هەمیشەیی فێستیڤاڵی سینەمای کراوەی "ئاسمان"، لە ته‌لاری وەحدەتی شاری مەهاباد، بەڕێوەچوو.

رێوڕەسمی کردنەوەی نوسینگه‌ی ئەمینداریەتی هەمیشەیی فیلم، سیناریۆی فیلم و وێنه‌ی فۆتۆگرافی "ئاسمان"، بە ئامادەبوونی سەرۆکی شارەوانی شاری مەهاباد، هونه‌رمه‌ندان، پێشه‌نگانی هونه‌ری سینه‌ما و شانۆگه‌ری، هاوتای هۆگرانی هونه‌ری حه‌وته‌م، لە هۆڵی ته‌لاری وەحدەتی شاری مەهاباد، بەڕێوەچوو.

لە سەرەتای ئەم مەراسیمەدا، پەردە لەسەر تابلۆی نه‌خشێندراوی سەرەکی نوسینگەی هەمیشەیی فێستیڤاڵی سینەمای کراوەی "ئاسمان" لادرا و پاشان به‌ سەردانی شوێنی نوسینگەی به‌ڕێوه‌به‌رایه‌تی هەمیشەیی ئه‌م فێستیڤاڵە، بەشێوه‌یەکی فەرمی کرایەوە.

به‌رپرسایه‌تی و بەڕێوەبردنی فێستیڤاڵەکە، له‌ لایه‌ن سەرۆکی شارەوانی مەهابادەوە بە "ئیبراهیم سەعیدی" سینەماکاری بەئەزموونی مەهاباد بەخشرا.

هەر لەمیانی مەراسیمەکەدا، کلیپێک لە چالاکییە هونەرییەکانی هەریەک لە هونەرمەندانی سینەما و شانۆ و تەلەفزیۆن، "سەڵاح شێخ محەمەدی" و "محەمەد کەریمی"، نمایشکرا و به‌ راگه‌یاندنی یه‌ک خوله‌ک بێده‌نگی ئاماده‌بووان؛ یاد و بیره‌وه‌ریی ئەم هونەرمەندە بەنرخە، به‌رز راگیرا.

لە کۆتایی مەراسیمی کردنەوەی نووسینگه‌ی هەمیشەیی فێستیڤاڵی فیلم، سیناریۆی فیلم و وێنه‌ی فۆتۆگرافی "ئاسمان"، کورتە فیلمی به‌ڵگه‌نامه‌یی و دۆکیومێنتاریی "حەوت سەمفۆنیای زاگرۆس" لە دەرهێنانی "پەرویز رۆستەمی"، نمایشکرا.

بڕیارە، یەکەمین خولی فێستیڤاڵی سینەمای کراوەی "ئاسمان"، بە رێبازی راکێشانی گەشتیاران و بە پێکهاتەیەکی جیاواز؛ لە لایەن دامه‌زراوه‌ی "لاوان فیلمی موکریان" بە سەرپەرشتی و به‌ڕێوه‌به‌رایه‌تی "ئیبراهیم سەعیدی" سینەماکاری شاری مەهاباد، رێکه‌وتی ئەیلولی ئەمساڵ، لە شاری مەهاباد بەرێوەبچێت.