هابیل حاجى ئەحمەد، بەڕێوەبەرى مۆنۆمێنتى ئەنفال لە چەمچەماڵ، بە کەناڵ8ى راگەیاند، سبەینێ چوارشەممە، 21ی شوبات، کاتژمێر10، رووفاتەکان لە گۆڕستانى مۆنۆمێنتى ئەنفال لە چەمچەماڵ بەخاکدەسپێردرێن.

گوتیشى: "بانگهێشتنامە بۆ سەرجەم بەرپرسانى باڵاى عێراق و کونسوڵخانە و باڵیۆزخانە و نوێنەرایەتییەکانى عێراق و هەرێمى کوردستان نێردراوە، تاوەکو ئامادەى بەخاکسپاردنى رووفاتى ئەنفالکراوان بن و ئاگادارى جینۆسایدکردنى گەلى کورد بن".

بەڕێوەبەرى مۆنۆمێنتى ئەنفال لە چەمچەماڵ، کە هاوکات ئەندامى لیژنەى باڵاى سەرپەرشتیارى مەراسیمەکەیە، ئەوەشى راگەیاند "ئامادەکارییەکان بۆ بەخاکسپاردنى روفاتى ئەنفالکراوان کۆتاییپێهاتووە و سبەینێ بەخاکدەسپێردرێن".

گوتیشى: "چوار رۆژە هەڵمەتى وەرگرتنى نموونەى خوێن لە کەسوکارى ئەنفالکراوان دەستیپێکردووە و تیمێکى پزیشکى بۆ ماوەى شەش رۆژ نموونەى خوێن لە کەسوکارى ئەنفالکراوان وەردەگرن و دواتر لەڕێگەى پشکنینى دى ئێن ئەى، لەگەڵ رووفاتەکاندا بەراورد دەکرێت و رووفاتەکان دەناسرێنەوە".

لە ئاداری ساڵی 2019دا رووفاتى 172 ئەنفالکراو لە گۆڕە بەکۆمەڵەکانى بیابانی سەماوە دۆزرانەوە و تاوەکو 13ی کانوونی دووەمی 2024، لەسەر راسپاردەى شاناز ئیبراهیم ئەحمەد، خانمی یەکەمی عێراق لە پزیشکی دادوەریی بەغدادەوە، گەڕێندرانەوە بۆ هەرێمی کوردستان.