بەهۆی نالەباری كەشوهەواوە، پارێزگاری هەولێر رۆژی چوارشەممە 20ـی ئازاری 2024ـی كردە پشووی فەرمی.

ئومێد خۆشناو، پارێزگاری هەولێر لە راگەیەندراوێكدا ئاماژەی بەوەكردووە، "بڕیارماندا رۆژی چوارشەممە 20ـی ئازاری 2024، لە سەرجەم فەرمانگە و دام و دەزگا و دامەزراوەکانی سنووری پارێزگای هەولێر، بکرێتە پشوو".

روونیشكراوەتەوە، ئەوەش بەهۆی ناسەقامگیری رەوشی کەش و هەوا، لەپێناو پاراستن و سەلامەتی گشتی، ماندوبوونی تیمەکان و سەرقاڵی و ئامادەکاریی هاوڵاتیان بۆ جەژنی نەورۆز و سەری ساڵی کوردی.

پێشتریش عەلی تەتەر، پارێزگارى دهۆک لە راگەیەندراوێكدا رۆژی چوارشەممەى لەسەرجەمى دامودەزگاکانى پارێزگاکە کردە پشووى فەرمى، ئەوەش بەهۆى ناجێگیرى کەشوهەواوە .

ماوەی چەند رۆژێكە شەپۆلێكی بارانبارین ناوچەكانی هەرێمی كوردستانی گرتووەتەوە و لە چەندین شوێنە لافاو دروستبووە و زیان بەر هاونیشتمانیان كەوتووە، هەر لە پارێزگاری دهۆك بەهۆی لافاوەوە سێ كەس گیانیانلەدەستداوە.