بۆ ئەمساڵ 17 هەزار دۆنم زەویی کشتوکاڵی گوندی تۆپزاوای پارێزگای کەرکوک، نەخراوەتە ناو پلانی کشتوکاڵییەوە.

ساتع ناسیح، نوێنەری جوتیارانی کوردی گوندی تۆپزاوا بەکەناڵ هەشتی راگەیاند، ساڵانی رابردووش هەمان گرفتمان هەبووە و ئەمساڵیش بەهەمانشێوە، زەوییە کشتوکاڵییەکانی جوتیارانی کورد و تورکمان نەکراونەتە نێو پلانی کشتوکاڵییەوە.

بەگوێرەی بەدواداچوونێکی کەناڵ هەشت، هۆکاری نەبوونی ئەو زەوییە کشتوکاڵییانە لەچوارچێوەی پلانی کشتوکاڵی، بۆ کێشەی خاوەندارێتییان دەگەڕێتەوە، بەم هۆیەشەوە لەتەواوی هاوکارییەکانی حکومەتی فیدراڵی و وەزارەتی کشتوکاڵی عێراق بێبەشدەکرێن وەکو پێدانی پێداویستییەکانی چاندن و کشتوکاڵ.

بەگشتی لەسنووری پاريزگای کەرکوک، زیاتر لە ملیۆنێک و دووسەد هەزار دۆنم زەوی کشتوکاڵی کێشەی موڵکدارییان لەسەرە بەهۆی دوو بڕیاری سەردەمی بەعس، لەم ژمارەیە 900 هەزار دۆنمیان بەهۆی بڕیارەکانی مەجلیسی قیادە سەورە و300 هەزاردۆنمیش بەهۆی بڕیارەکانی لیژنەی شئون شیمال.