پاش دەستپێکردنى هێرشەکانى ئێران بۆسەر ئیسرائیل، چەند ناوچەیەک لە شارى هەولێر بۆردوومانکران، بەڵام لەلایەن سیستمى بەرگریى ئاسمانییەوە، هێرشەکان پوچەڵکرانەوە.

ئەیوب وەرتی، پەیامنێرى کەناڵ8، لە هەولێر، رایگەیاند: درەنگانى بەرەبەیانی یەکشەممە 14ی نیسان، بەچەند مووشەکێک هێرشکرایە سەر فڕۆکەخانەى نێودەوڵەتیى هەولێر و چەند ناوچەیەکى دەوروبەرى، بەڵام لەلایەن سيستمى بەرگریى ئاسمانییەوە، هێرشەکان پوچەڵکرانەوە.

ئەیوب وەرتی، ئاماژەى بەوەشدا، نەک تەنیا فڕۆکەخانە، بەڵکو چەند ناوچەیەکى دیکەى هەولێر رووبەڕووى هێرشەکان بووەوە، بەڵام هیچ زیانێکى گیانى و ماددییان لێنەکەوتووەتەوە.

پەیامنێرى کەناڵ8 لە هەولێر، ئەوەشى ئاشکراکرد، تاوەکو ئێستا نازانرێت ئەو هێرشانە لەلایەن چ لایەنێکەوە ئەنجامدراوە، هیچ بەرپرسێکى حکومەتى هەرێمی کوردستانیش وەڵامى پەیوەندییە تەلەفونییەکانى کەناڵ8ى نەدایەوە و لەوبارەوە زانیارییەکان بڵاونەکراوەتەوە.