سەرۆکایەتیی ئەرکانی گشتیی هێزە چەکدارەکانی ئێران راپۆرتی سەرەتایی کۆمیتەی لێکۆڵینەوە لە کەوتنەخوارەوەی هێلیكۆپتەرەكەی سەرۆککۆماری ئێرانی بڵاوکردەوە و تێیدا هاتووە، هیچ ئاسەوارێكی كردنەئامانجی هێلیكۆپتەرەكە نەدۆزراوەتەوە.

راپۆرتەکە دەڵێت، "بەشێکی زۆر لە زانیارییەکان لە بوارە تایبەتمەند و تەکنیکی و گشتییە جیاوازەکاندا کۆکراونەتەوە، کە دەکرێت پەیوەندییان بە رووداوەکەوە هەبێت".

راپۆرتەکە هەندێک ئەنجامی لێکۆڵینەوەکانی خستووەتەڕوو و باس لەوەكراوە، "هەلیکۆپتەرەکە لەسەر رێگای پلان بۆ داڕێژراو بەردەوامبووە و لە رێڕەوی فڕینی دیاریکراو لاینەداوە، تاوەکو نزیکەی خولەکێك و 30 چركە پێش کەوتنەخوارەوەی هێلیکۆپتەرەکە، فڕۆکەوانی هێلیکۆپتەرەکەی سەرۆک، پەیوەندی لەگەڵ دوو هێلیکۆپتەرەکەی دیکە کردووە.

بەگوێرەی راپۆرتەکە، هیچ ئاسەواری گولـلە یاخود بارودۆخێکی هاوشێوە لە پاشماوەی پێکهاتەکانی فڕۆکە تێکشکاوەکەدا بەدی نەکراوە و هێلیکۆپتەرەکە دوای پێکدادان لەگەڵ بەرزییەکاندا گڕی گرتووە.

لە راپۆرتەکەدا هاتووە، "بەهۆی ئاڵۆزیی ناوچەکە و تەم و نزمیی پلەی گەرما، ئۆپراسیۆنی گەڕان بەدرێژایی شەو بەردەوامبوو، لەبەرەبەیانی زوودا رۆژی دووشەممە کاتژمێر 05:00 بە هاوکاریی فڕۆکەی بێفڕۆکەوانی ئێرانی، شوێنی رووداوەکە ئاشکرا بووە".

ئاشکراشیکردووە "لە گفتوگۆکانی نێوان تاوەری کۆنترۆڵ و تیمی فڕۆکەواندا، هیچ حاڵەتێکی گوماناوی تێبینی نەکراوە."

لە کۆتاییدا لیژنەکە دەڵێت، "بەشێکی زۆر لە بەڵگەنامەکانی پەیوەست بەو رووداوە کۆکراونەتەوە، پشکنین و بەدواداچوون بۆ هەندێک پارچە و بەڵگەنامەکانیش پێویستی بە کاتێکی زیاترە و دواتر رادەگەیەنرێت.