بەگوتەی پۆلیس، لە شاری سێڤیلی لە ئیسپانیا، لێکۆڵینەوە لە دۆسیەیەک دەکەن کە تێیدا پێنج گەنج تۆمەتبارن بە بەبەکارهێنانی ژیریی دەستکرد، بۆ دروستکردن و بڵاوکردنەوەی وێنەی پۆرنۆگرافی 20 کچی گەنج، کە بەشێکیان خوار تەمەنی یاسایین و بە شێوەی ئۆنلاین بڵاویاندەکەنەوە.

لێکۆڵینەوە لە دۆسییەکە دوای ئەوەدێت، کە دایک و باوکی یەکێک لە کچەکان سکاڵایان تۆمارکردووە و ئاماژەیان بەوەکردووە، پاش دروستکردنی وێنە ساختەکان، لەرێگەی تۆڕە کۆمەڵایەتیەکاناوە بڵاوکرانەوە، ئەمەش زیانێکی زۆری لە رووی دەروونی و کۆمەڵایەتی بە قوربانییەکان گەیاندووە.

پۆلیس رایگەیاندووە، وێنەکان زۆر راستەقینە دەردەکەون و جیاکردنەوەیان کارێکی قورسە. بەڵام ئەگەری ئەوە هەیە ئەو پێنج گەنجەی ئەو کارەیان ئەنجامداوە رووبەڕووی تۆمەتی پۆرنۆگرافیای منداڵان و پێشێلکردنی یاساکانی پاراستنی نهێنی ببنەوە.

پسپۆران پێیانوایە گەشەسەندی بەردەوامی ژیریی دەستکرد وایکردووە بەهەمانشێوە پۆرنۆگرافی دیپفەیک زیاترببێت. لەبەرئەوەی ئەی ئای دەتوانێت بە ئاسانی ئەو وێنە و ڤیدیۆیانە دروستبکات کە راستەقینە دەردەکەون.