د. گەشبین کاوە، پسپۆڕی منداڵان، تازەلەدایکبووان و گەشە

گرنگە دایک و باوکان وریابن لە چۆنیەتیی هەڵگرتن و شوێنی دانانی ئەو کەرەستە و ماددانەی ئەگەری ئەوەیان هەیە کە منداڵان ژەهراوی بکەن. زۆربەی ژەهراویبوونەکانی منداڵان لە ماڵەوە روودەدەن، بەجۆرێک دەکرێت هەندێک لەم ژەهراویبوونانە مەترسییەکی گەورەبن لەسەر تەندروستی و ژیانی منداڵەکە.

ئەو ماددانەی دەبنەهۆی ژەهراویبوونی منداڵان

• خواردنی تەنیا یەک حەب لە هەندێک دەرمان لەلایەن منداڵی ساواوە، دەکرێت ببێتەهۆی گیانلەدەستدانی.
• دەرمانەکانی تایبەت بە قڕکردنی مێروو دووبارە دەشێت ببنەهۆی گیانلەدەستدانی منداڵ.
• پاککەرەوەکانی ئاوەڕۆ و فاست، رەنگە چەندین کاریگەریی نەرێنیی ماوەدرێژ لەسەر تەندروستیی منداڵ بەجێبهێڵن.
• ماکیاژیش یەکێکە لەو ماددانەی نابێت لەبەردەستی منداڵدا بێت، چونکە بەرکەوتنی راستەوخۆی ئەم ماددانە بە پێستی منداڵی ساوا، وا دەکات پێست ماددەکان هەڵبمژێت و کاریگەرییەکی خراپی لەسەر ئاستی هۆرمۆنەکانی منداڵەکە هەبێت.
• خواردنەوەی بەنزین و ماددە ژەهراوییە هاوشێوەکانی، مەترسییەکی گەورە دەهێننەئاراوە.

رێگەکانی پاراستنی منداڵ

• دەرمان و ماکیاژ لە شوێنێکی بەرز، یان دۆڵابێکی قفڵکراودا دابنرێن، تاوەکو مناڵەکە نەتوانێت پێیان بگات.
• نەوت و بەنزین نەخرێنە دەبەی ئاوەوە.
• فاست و پاککەرەوەکان لە شوێنێکی داخراو و دوور لە چاوی منداڵدا هەڵبگیرێن.