پەیامنێرى کەناڵ8 رایگەیاند "یەکەم دانیشتنى ئەنجوومەنى پارێزگاى کەرکوک پاش پێکهێنانى حکومەتى خۆجێیى دەستیپێکرد".

پەیامنێرى کەناڵ8 ئاماژەى بەوە کرد "نۆ ئەندام لە کۆبوونەوەى ئەنجوومەنى پارێزگاى کەرکوک بەشدارن و رێژەى یاسایى تەواو بووە".

روونیشیکردەوە "ئەندامەکانى فراکسیۆنى پارتى دیموکراتى کوردستان و هاوپەیمانیى عەرەبى و بەرەى تورکمانى لە کۆبوونەوەکە بەشدارنین".

بەگوێرەى کارنامەى دانیشتنى ئەنجوومەنەکە، سێ تەوەر تاوتوێ دەکرێت ئەوانیش، پەیڕەوى ناوخۆى ئەنجوومەن، گفتوگۆکردن لەبارەى دامەزراندنى حەوت هەزار و 500 کەس بەشێوەى گرێبەست و بانگێشتکردنى پێکهاتەى تورکمان بۆ پڕکردنەوەى پۆستەکانیان.

لەدواى کۆبوونەوەکە و لەمیانەى ئەنجامدانى کۆنفرانسێکى رۆژنامەوانیدا سەرۆکى فراکسیۆنى کەرکوک هێز و ئیرادەمانە رایگەیاند "رێککەوتین لیژنەیەک بۆ هەموارى یاساى ئەنجوومەنى پارێزگاى کەرکوک پێکبهێنین".

نەشئەت شاهوێز، گوتیشى "بانگهێشتى نوێنەرانى پارتى و پێکهاتەى تورکمان دەکەین بۆ رادەستکردنى ناوى بەربژێرانى پۆستەکانیان".

روونیشیکردەوە "لیژنەیەک بۆ راییکردنى رێکارەکانى دامەزراندنى 7500 پلە وەزیفییەکەى کەرکوک پێکهێنرا".

جەختیشیکردەوە "ناهێڵین لە دامەزراندندا ستەم لە هیچ پێکهاتەیەکى شارەکە بکرێت".