سەرپەرشتیاری پرۆژەی شەقامی 100 مەتریی سلێمانی رایگەیاند، کارکردن لە پرۆژەکە بەردەوامە و تاوەکو ئێستا 65%ـی کارەکانى قۆناغى یەکەم تەواو بووە.

بەکر تەیب، سەرپەرشتیاری پرۆژەی شەقامی 100 مەتری لە شارەوانیی سلێمانی بە کەناڵ8ـی راگەیاند، کارکردن لە شەقامی 100 مەتریی سلێمانی بەشێوەیەکى باش بەڕێوەدەچێت و قۆناغى یەکەمى کە 33 کیلۆمەترەو لە تاسڵوجەوە دەگاتە گوندى دەمرکان، تاوەکو ئێستا 20 کیلۆمەتری قیرتاوکراوە.

گوتیشی، "65%ـی قۆناغى یەکەمى پرۆژەکە تەواو بووە و ئێستا کار لە یەکتربڕەکان و تێکەڵڕێژکردنی شەقامەکە دەکرێت".

بەگوتەی بەکر تەیب، ئەگەر بەوشێوەیەى ئێستا کارەکان بەردەوامبن، ئەوا لە ئایندەیەکى نزیکدا پرۆژەکە تەواو دەکرێت و دەخرێتە خزمەتی هاونیشتمانییانەوە.

شەقامى 100 مەترى یاخود ئوتوبانى بابان، سێ قۆناغە و درێژییەکەی 146 کیلۆمەترە، لە تاسڵوجەوە بۆ تونێلی پێشڕەو درێژ دەبێتەوە.