پەککەوتنی کتوپڕی جگەر، بریتییەلە لەکارکەوتنی لەناکاوی جگەر لەماوەی چەند رۆژێکدا، لەو کەسانەدا روودەدات پێشتر گرفتی جگەریان نەبووە.

نیشانەکان

• هەستکردن بە ئازار لە بەشی سەرەوەی لای راستی سک
• ئاوسانی ناوسک
• دڵتێکەڵهاتن و رشانەوە
• زەردوویی
• بێهێزی
• تێکچوونی باری هۆشداری
• بێخەوی
• بۆگەنبوونی هەناسە
• دەست لەرزین

هۆکارەکان

• بەکارهێنانی پاراسیتامۆڵ بە بڕی زیاد لە پێویست
• بەکارهێنانی هەندێک دەرمانی ئازارشکێن و دژەبەکتریا
• بەکارهێنانی دەرمانی گیایی
• هەوکردنی ڤایرۆسیی جگەر
• خواردنی ژەهراوی، وەک چەند جۆرێکی قارچک
• نەخۆشیی دژەخۆیی جگەر
• چەند نەخۆشییەکی خوێنهێنەرەکانی جگەر

چ کاتێک سەردانی پزیشک بکرێت؟

ئەم نەخۆشییە بەچەند نیشانەیەکی لەپڕ، لە کەسێکی تەندروستدا دەردەکەوێت؛ وەک زەردوویی، ئازار لە بەشی سەرەوەی لای راستی سک، تێکچوونی لایەنی دەروونی و باری هۆشداری، لە کاتی بوونی یەکێک یان زیاتر لەم نیشانانە، پێویستە بەزوویی سەردانی نەخۆشخانە بکرێت بۆ وەرگرتنی چارەسەر.

ماکەکان

دەکرێت پەککەوتنی کتوپڕی جگەر ئەم ماکانەی هەبێت:-

1. هەڵئاوسانی توێکڵی مێشک، ئەمە رەنگە ببێتەهۆی گەشکە و تێکچوونی باری هۆشداری
2.  خوێنبەربوون
3. هەوکردن
4. پەککەوتنی گورچیلەکان

چۆن خۆپارێزی بکرێت لە توشبوون بە پەککەوتنی کتوپڕی جگەر؟

• پێویستە لە کاتی بەکارهێنانی دەرماندا، رێنمایی و زانیارییە هاوپێچکراوەکانی دەرمانەکە بەتەواوی بخوێنرێتەوە
• پێویستە زانیاری تەواو لەسەر هەر نەخۆشی و گرفتێکی تەندروستی بدرێت بە پزیشک لەکاتی نووسینی دەرماندا
• هەوڵدان بۆ کەمکردنەوە یان وازهێنان لە خواردنەوە کحولییەکان
• وەرگرتنی ڤاکسینی ڤایرۆسی جگەر مەترسیی توشبوون بە پەککەوتنی کتوپڕی جگەر کەمدەکاتەوە
• خۆبەدوورگرتن لە بەرکەوتن بە خوێن و شلەی لەشی کەسانی دیکە، مەترسیی توشبوون بەم نەخۆشییە کەمدەکاتەوە
• دڵنیابوونەوە لە جۆری قارچک پێش بەکارهێنانی
• پاراستنی پێست لە بەرکەوتن بە هەندێک ماددەی کیمایی

چارەسەر

پەککەوتنی کتوپڕی جگەر، لە نەخۆشخانە، بەتایبەت لە یەکەی چاودێریی ورد، لەژێر سەرپەرشتی پزیشکی پسپۆڕدا چارەسەردەکرێت. پزیشک، بەگوێرەی هۆکاری نەخۆشییەکە و ئاستی توندییەکەی، بڕیار لەسەر جۆری چارەسەرەکە دەدات.