حەج و عەمرە: هەر حەفتا هەزار فۆڕمەکەی حەج پشکنینیان بۆ دەکرێت

پووختەی هەواڵەکە:

تیمێکی تایبەت ڕۆژانە پشکنین بۆ ئەو فۆڕمانە دەکەن کە بۆ حەج پڕکراونەتەوە.

تاوەکو ئێستا نزیکەی 70 هەزار هاونیشتمانی بۆ بەجێهێنانی فەریزەی حەج فۆڕمیان پڕکردووەتەوە.

داواکاران لە ڕێگەی نامەوە ئاگادار دەکرێنەوە کاتێک فۆڕمەکانیان بۆ قۆناغی تیروپشک ئامادە دەبێت.

ڕۆژی 10ی ئاب کۆتا وادەیە بۆ پڕکردنەوەی فۆڕمی ئۆنلاین بۆ حەجی دوو ساڵی داهاتوو.

زانیاری گەیشتووە بە کەناڵ8 دەریدەخات کە پڕۆسەی وردبینیکردن لە فۆڕمی داواکارانی حەج بەردەوامە و هیچ داواکارێک بەهۆی دواکەوتنی پشکنینەوە لە تیروپشک بێبەش نابێت. بەڕێوەبەرایەتیی حەج و عەمرە دڵنیایی دەداتە هاونیشتمانییان کە هەموو فۆڕمە سەرکەوتووەکان دەخرێنە ناو پڕۆسەی تیروپشکەوە.

قۆناغەکانی وەرگرتنی فۆڕم و وردبینیکردن:

دوای پڕکردنەوەی فۆڕمەکە، سەرەتا ئاگادارییەک بۆ داواکار دەچێت کە فۆڕمەکەی "نێردراوە بۆ پشکنین".

تیمێکی پسپۆڕ ڕۆژانە وردبینی لە زانیارییەکان دەکەن و ئەگەر هیچ گرفتێک نەبوو، وەڵامەکە دەگۆڕێت بۆ "نێردراوە بۆ تیروپشک".

ئەگەر هەر فۆڕمێک کەموکوڕی یان گرفتی تێدا بێت، خاوەنەکەی ڕاستەوخۆ ئاگادار دەکرێتەوە بۆ چاککردنی.

پێویست بە نیگەرانی ناکات چونکە تەواوی ئەو 70 هەزار فۆڕمەی پڕکراونەتەوە، پڕۆسەی وردبینییان بۆ ئەنجام دەدرێت.

وەزارەتی ئەوقاف و کاروباری ئایینی لە ڕێگەی سیستەمێکی ئۆنلاینەوە ناوی داواکاران بۆ حەجی ساڵانی 2025 و 2026 وەردەگرێت. هاونیشتمانییان تاوەکو کۆتایی ڕۆژی 10ی ئاب دەرفەتیان لەبەردەمدایە بۆ خۆتۆمارکردن. دوای تەواوبوونی وادەکە و کۆتاییهاتنی وردبینیکردنی هەموو فۆڕمەکان، وادەی تیروپشکە گشتییەکە ڕادەگەیەنرێت تاوەکو ناوی حاجییانی داهاتوو دیاری بکرێت.

زانیاری زیاتر بۆ تۆ