پووختەی هەواڵەکە

• هەرێمی کوردستان لە بەرهەمەکانی پەتاتە، گەنم، گۆشتی مریشک، هێلکە و سەوزەوات گەیشتووەتە ئاستی خۆبژێوی.

• بەرهەمەکانی هەنگوین، قارچک و شیر لە 70%ـی پێداویستییەکانی ناوخۆی هەرێمی کوردستان دابین دەکەن.

• بڕێکی زۆر لە بەرهەمە زێدەکان وەک گۆشتی مریشک، هێلکە و پەتاتە دەنێردرێنە ناوەڕاست و خوارووی عێراق.

---

بەگوێرەی زانیارییە گەیشتووەکان بە کەناڵ8، ڕزگار حەمەخدر، ڕاوێژکاری وەزارەتی کشتوکاڵ و سەرچاوەکانی ئاوی حکومەتی هەرێمی کوردستان ڕایگەیاند، هەرێمی کوردستان لە بەرهەمهێنانی چەندین بەروبوومی سەرەکیدا گەیشتووەتە ئاستی خۆبژێوی و بەشێک لە بەرهەمەکانیش هەناردەی ناوەڕاست و خوارووی عێراق و دەرەوە دەکات.

---

ئاستی بەرهەمهێنانی بەروبوومە سەرەکییەکان لە هەرێمی کوردستان

• ساڵانە لە کۆی نزیکەی 1 ملیۆن تۆن پەتاتە، پێداویستیی ناوخۆ 300 هەزار تۆنە و ئەوی دیکەی ساغدەکرێتەوە.

• زیاتر لە 1 ملیۆن تۆن گەنم بەرهەمهێنراوە و نزیکەی 700 هەزار تۆنی بە شێوازی جۆراوجۆر ساغکراوەتەوە.

• بەرهەمهێنانی ساڵانەی گۆشتی مریشک 400 هەزار تۆنە، لەکاتێکدا پێداویستیی ناوخۆ 150 بۆ 170 هەزار تۆنە.

• لە ڕێگەی 59 پڕۆژەوە 4 ملیار و 400 ملیۆن هێلکە بەرهەمدێت و 1 ملیار و 700 ملیۆنی بۆ ناوخۆیە.

• ساڵانە 2 ملیۆن تۆن سەوزەوات بەرهەمدێت، لەکاتێکدا پێداویستیی ناوخۆیی 750 هەزار بۆ 1 ملیۆن تۆنە.

پلانی وەزارەتی کشتوکاڵ بۆ گەیشتن بە خۆبژێویی تەواوەتی

لە بەرهەمەکانی هەنگوین، شیر و قارچکدا خۆبژێوی گەیشتووەتە 70%، بە جۆرێک چاوەڕوان دەکرێت 500 بۆ 600 تۆن هەنگوین بەرهەمبهێنرێت و بەشێکیشی ڕەوانەی ئیمارات بکرێت. لە هەمان کاتدا، بە هەماهەنگی لەگەڵ ڕێکخراوی فاو و ڕێگەی کارگەی گەورە و پڕۆژە ستراتیجییەکانی مانگای شیر، هەنگاو بۆ بونیادنانی سەنتەری کۆکردنەوەی شیر دەکرێت تاوەکو بەرەو خۆبژێویی تەواوەتی بڕوات، هاوکات ساڵانە 3 هەزار تۆن قارچک بەرهەمدێت و هەماهەنگیش لەگەڵ شوێنەکانی دروستکردنی پیتزا کراوە بۆ بەکارهێنانی بەرهەمی خۆماڵی.

زانیاریی زیاتر لەسەر بابەتەکە

پێداویستیی ئاردی ساڵانەی هاووڵاتییان و نانەواخانە و سەمونخانەکان نزیکەی 800 بۆ 850 هەزار تۆن ئاردە کە پێویستی بە 1 ملیۆن تۆن گەنم دەبێت، بڕیار لەسەر دەستپێشخەرییەکیش دراوە بە لێخۆشبوونی باج و ڕسوماتی گومرگی بۆ ماوەی 1 مانگ بۆ 11 کۆمپانیا کە داوای کڕینەوەی گەنمیان کردووە تاوەکو هەناردەی دەرەوەی بکەن. لە سەرچاوەکانی دیکەی شیریشدا، پێداویستیی ساڵانەی تاک 80 لیترە کە دەکاتە 480 ملیۆن لیتر لە ساڵێکدا و لە ئێستادا ئاستی بەرهەمهێنان لەسەروو 300 ملیۆن لیترە.

زانیاریی زیاتر بۆ تۆ

وەزارەتی کشتوکاڵ: یەک دینارمان نییە بۆ پێدانی پێشینە بە جووتیاران

وەزارەتی کشتوکاڵ :نابێت ڕێژەى کرێکارى خۆماڵى لە پڕۆژەکان لە %75 کەمتر بێت

میدیا و زانیاری: وەبەرهێنانی کشتوکاڵی گەیشتە %12 و هەرێم بەرەو خۆبژێوی هەنگاوی گەورە دەنێت