دادگای فیدراڵی کاتی یەکلاکردنەوەی چارەنووسی کابینەی نۆی دیاریکرد
پووختەی هەواڵەکە:
- دادگای فیدراڵی لە 20ـی ئەیلول دانیشتنێک لەسەر سکاڵای بەسەرچوونی تەمەنی کابینەی نۆ بەڕێوەدەبات.
- سکاڵاکار داوا دەکات تەمەنی یاسایی حکومەتی هەرێم لە 10ـی تەممووزی 2023ـەوە کۆتایی پێ بهێنرێت.
- ئەگەر سکاڵاکە پەسەند بکرێت، بڕیارەکانی کارەبا، باج و گرێبەستە نەوتییەکان هەڵدەوەشێنرێنەوە.
- داوا کراوە دەسەڵاتی دەرکردنی هەر بڕیارێکی نوێ لە حکومەتی کاربەڕێکەر وەربگیرێتەوە.
زانیاریی گەیشتووە بە کەناڵ8 کە دادگای باڵای فیدراڵیی عێراق دانیشتنێکی یەکلاکەرەوەی بۆ 20ـی ئەیلول دیاریکردووە بۆ یەکلاییکردنەوەی چارەنووسی کابینەی نۆی حکومەتی هەرێم. ئەم دانیشتنە ڕاستەوخۆ کار دەکاتە سەر هەموو ئەو بڕیارانەی حکومەت لە دوای 10ـی تەممووزی 2023ـەوە دەری کردوون. ئەگەر دادگا بڕیاری کۆتاییهاتنی ماوەی یاسایی کابینەکە بدات، دەیان بڕیاری دارایی و ستراتیژی لە هەرێمی کوردستان هەڵدەوەشێنرێنەوە.
ناوەڕۆکی سکاڵاکە و داواکارییەکان
- ڕێبوار ئەوڕەحمان، پەرلەمانتاری نەوەی نوێ، سکاڵاکەی دژی سەرۆکی حکومەتی کاربەڕێکەر تۆمار کردووە.
- سکاڵاکار داوا دەکات دادگا بڕیار بدات کە لە 10ـی تەممووزی 2023ـەوە شەرعییەتی کابینەی نۆ کۆتایی هاتووە.
- داوا کراوە حکومەت تەنیا لە چوارچێوەی "کاربەڕێکردن"دا بمێنێتەوە و دەسەڵاتی واژۆکردنی گرێبەستی نوێی نەبێت.
- پێویستە هەموو ئەو بڕیارانەی سەبارەت بە بەرزکردنەوەی نرخی کارەبا، باج و گومرگ دەرکراون هەڵبوەشێنرێنەوە.
کاریگەریی بڕیارەکە لەسەر سێکتەرە ستراتیژییەکان
ئەگەر دادگا سکاڵاکە پەسەند بکات، سەرجەم ئەو گرێبەستە ستراتیژییانەی لە سێکتەری نەوت و غاز واژۆ کراون یان گۆڕانکارییان تێدا کراوە، دەکەونە ژێر پرسیار و هەڵدەوەشێنرێنەوە. هەروەها حکومەت ناتوانێت هیچ بڕیارێک دەربکات کە پابەندیی دارایی و سیاسیی درێژخایەن بۆ کابینەکانی داهاتوو دروست بکات. ئامانجی کۆتایی سکاڵاکە ئەوەیە کە دەسەڵاتەکانی هەرێمی کوردستان ناچار بکرێن تەنیا ئەو کارانە بکەن کە ناکرێت دوابخرێن، تا ئەو کاتەی کابینەیەکی نوێ لە پەرلەمانی کوردستانەوە شەرعییەت وەردەگرێت.
زانیاری زیاتر بۆ تۆ
دادگای فیدراڵی سکاڵایەک لەسەر حکومەتی کاربەڕێکەری هەرێم تاوتوێدەکات
نەوەی نوێ پەنا دەباتە بەر بەغداد بۆ هەڵوەشاندنەوەی گرێبەستە گەورەکانی حکومەتی هەرێم
2 کاتژمێر پێش ئێستا