پووختەی هەواڵەکە:

• حکومەتی عێراق ڕژدە لەسەر کشانەوەی هێزەکانی هاوپەیمانان لە 30ـی ئەیلولی 2026.

• هەرێمی کوردستان بەهۆی مەترسیی هێرشە درۆنییەکان داوای دابینکردنی سیستمی بەرگریی ئاسمانی دەکات.

• دوای کشانەوەکە هاوکارییە داراییەکانی هاوپەیمانان بۆ پێشمەرگە ڕادەگیرێن و تەنها مەشق و ڕاهێنان بەردەوام دەبێت.

• لیژنەیەکی تایبەت بۆ دیاریکردنی شێوازی هەماهەنگییە سەربازییەکانی دوای قۆناغی کشانەوەی هێزەکان پێکدەهێنرێت.

---

زانیارییەک گەیشتووە بە کەناڵ8 کە هەرێمی کوردستان لە چوارچێوەی گفتوگۆکانی لەگەڵ بەغداد و واشنتن، جەختی لە پێویستیی وەرگرتنی سیستمی بەرگریی پێشکەوتوو کردووەتەوە. ئەمەش لە کاتێکدایە کە بڕیارە لە 30ـی ئەیلولدا ئەرکی سەربازیی هاوپەیمانان کۆتایی بێت و قۆناغی هەماهەنگیی دوو قۆڵی لە عێراق دەستپێبکات.

---

هەڵوێستی هەرێمی کوردستان:

• ڕێبەر ئەحمەد، وەزیری ناوخۆ ڕایگەیاندووە کە لەگەڵ عێراق و هاوپەیمانان لە گفتوگۆدان بۆ پاراستنی ئاسایشی هەرێمی کوردستان.

• حکومەتی هەرێمی کوردستان داوای دابینکردنی سیستمی بەرگری دەکات بۆ بەرپەرچدانەوەی ئەو هێرشە درۆنی و مووشەکییانەی دەکرێنە سەر ناوچەکە.

• نیگەرانییەکان لەوەوە سەرچاوە دەگرن کە کشانەوەی سیستمە بەرگرییەکانی ئێستای هاوپەیمانان بۆشایی ئەمنی دروست بکات.

کاریگەرییەکان لەسەر هێزی پێشمەرگە:

جەبار یاوەر، ئەمینداری پێشووی وەزارەتی پێشمەرگە ئاماژە بەوە دەکات، هاوپەیمانان کە لە ساڵی 2014ـەوە هاوکاری پێشمەرگەیان کردووە، لە دوای 30ـی ئەیلول هاوکارییە داراییەکانیان ڕادەگرن. بەڵام جەخت دەکاتەوە کە پشتیوانییەکان لە چوارچێوەی لۆجستی، مەشق و ڕاهێنان و پرۆسەی چاکسازی لە وەزارەتی پێشمەرگە بەردەوام دەبن.

هەنگاوەکانی حکومەتی فیدراڵ:

سەباح نوعمان، گوتەبێژی فەرماندەی گشتیی هێزە چەکدارەکان ڕایگەیاندووە، سەرۆکوەزیرانی عێراق فەرمانی بە پێکهێنانی لیژنەیەکی تایبەتمەند کردووە بۆ دیاریکردنی شێوازی پەیوەندییەکان لەگەڵ هاوپەیمانان لە قۆناغی داهاتوودا. هەروەها ئاماژەی بەوە کردووە کە ئەو پێگە سەربازییانەی لە لایەن هاوپەیمانانەوە لە هەرێمی کوردستان چۆڵدەکرێن، ڕادەستی هێزی پێشمەرگە دەکرێنەوە.

زانیاری زیاتر بۆ تۆ

ڕێبەر ئەحمەد: هێشتا پێویستیمان بە هاوکارییەکانی هاوپەیمانان هەیە

ئەمینداری وەزارەتی پێشمەرگە: هاوپەیمانان سیستمی پاتریۆت لە فڕۆکەخانەی هەولێر دەگوازنە