دەستپێکردنی 8 پڕۆژەی ستراتیژیی ڕێگەوبان لە سەنتەری شاری سلێمانی
پووختەی هەواڵەکە:
- ئەمساڵ کارکردن لە 8 پڕۆژەی گرنگی دروستکردنی پرد و یەکتربڕ لە ناو شاری سلێمانی دەستیپێکردووە.
- پڕۆژەکان ئامانجیان کەمکردنەوەی لۆد و قەرەباڵغیی سەر شەقامە سەرەکییەکان و ئاسانکاریی هاتوچۆی شۆفێرانە.
- دروستکردنی 3 شەقامی نوێ بۆ بەستنەوەی ناوشار بە شەقامی 100 مەتری لە قۆناغی جێبەجێکردندایە.
- پڕۆژەی "شەقامی بابان" و فراوانکردنی ڕێگەی عەربەت بەشێکی گرنگی پلانی ئەمساڵی ڕێگەوبانن.
سەرەڕای بەردەوامیی قەیرانی دارایی، نەخشەی هاتوچۆی ناو شاری سلێمانی گۆڕانکاریی ڕیشەیی بەسەردا دێت. لە ئێستادا کارکردن لە 8 پڕۆژەی ستراتیژی لە سەنتەری شار دەستیپێکردووە، کە دیارترینیان یەکتربڕی گۆیژە و پردی شەهید شەوکەتن؛ ئەم پڕۆژانە نەک هەر لۆدی سەر شەقامی بازنەیی مەلیک مەحمود کەمدەکەنەوە، بەڵکو جووڵەی ئۆتۆمبێل لە چەند گەڕەکێکی سەرەکی بەتەواوی سەربەست دەکەن.
پڕۆژەکانی ناو شار و شەقامی مەلیک مەحمود:
- پردی شەهید شەوکەتی حاجی موشیر: 30%ـی کارەکانی تەواو بووە و گەڕەکی بەختیاری بە سەرچنار دەبەستێتەوە.
- یەکتربڕی گۆیژە: کارکردن تێیدا دەستیپێکردووە و لە ماوەی 2 ساڵدا 6 جووڵەی هاتوچۆ لە نێوان شەقامی مەلیک مەحمود و تووی مەلیک سەربەست دەکات.
- شەقامی بابان (سەرچنار-قولەرەیس): پڕۆژەیەکی دووسایدە و لە 3 قۆناغ پێکدێت، بڕیارە ئەمساڵ 2 قۆناغی تەواو بکرێت بۆ خزمەتی دانیشتووانی پڕۆژەکانی نیشتەجێبوون.
پڕۆژەکانی دەروازە و بەستنەوەی شەقامەکان:
ڕێگەی سلێمانی-عەربەت: لاینێکی نوێ بۆ هەردوو سایدی ڕێگەکە زیاد دەکرێت بۆ ئاسانکاریی هاتوچۆی هەڵەبجە و گەرمیان.
شەقامی شارباژێڕ: دووبارە دروستکردنەوەی ڕێگەی سیتەک و شارباژێڕ بۆ کەمکردنەوەی قەرەباڵغیی ڕۆژانی پشوو.
بەستنەوە بە شەقامی 100 مەتری: 3 شەقامی نوێ لە ناو شارەوە بەرەو شەقامی 100 مەتری دروست دەکرێن تاوەکو لۆدی سەر ڕێگەی تاسڵوجە و عەربەت و شەقامی بازنەیی مەلیک مەحمود کەمبێتەوە.
ئەم پڕۆژانە لە قۆناغی جیاوازی جێبەجێکردندان و بە تەواوبوونیان بەشێکی گەورەی کێشەی قەرەباڵغی لە سەنتەری شار و دەروازە سەرەکییەکان چارەسەر دەبێت.
زانیاری زیاتر بۆ تۆ
حکومەت ڕەزامەندی لەسەر دروستکردنی سێ شەقامی نوێ بۆ سلێمانی دا
شارەوانی سلێمانی: 250 کیلۆمەتر لە شەقامەکان قیرتاو کراونەتەوە
دوو پڕۆژەى ستراتیجیی ڕێگەوبان؛ پارێزگای سلێمانى قۆناغێکی دیکە دەبەنە پێشەوە
1 کاتژمێر پێش ئێستا