قۆرخکردنی دەرمان و پشکنینی تاقیگەیی لە نەخۆشخانە حکومییەکانی هەرێمی کوردستان

پووختەی هەواڵەکە:

حکومەتی هەرێمی کوردستان کەرتی دەرمان و پشکنینە تاقیگەییەکان بۆ دوو کۆمپانیای تایبەت قۆرخ دەکات.

بەپێی نووسراوێکی نهێنی، کۆمپانیای بیدکۆ بەبێ دەستەبەری بانکی پشکنین بۆ نەخۆشخانە گشتییەکان دابین دەکات.

کۆمپانیای گڵۆبین فارما ئەرکی دابینکردنی تەواوی دەرمانی شێرپەنجەی لە سەرتاسەری هەرێمی کوردستان پێسپێردراوە.

کەرتی تەندروستی لە هەرێم بەدەست کەمیی دەرمان، هەڵەی پزیشکی و نەبوونی بیمەی تەندروستییەوە دەناڵێنێت.

زانیارییەک گەیشتووە بە کەناڵ8 کە حکومەتی هەرێمی کوردستان لە چوارچێوەی چەند بڕیارێکی نوێدا، جڵەوی گرنگترین بەشەکانی کەرتی تەندروستی داوەتە دەست دوو کۆمپانیای کەرتی تایبەت. ئەم هەنگاوە لە کاتێکدایە کە نەخۆشخانە حکومییەکان لە لێواری پەککەوتندان و هاوڵاتییان بەدەست گرانیی نرخ و کەمیی خزمەتگوزارییە سەرەتاییەکانەوە دەناڵێنن.

بڕیارەکانی حکومەت و ناوەڕۆکی بەڵگەنامەکان:

بەپێی نووسراوێکی نهێنی کە لە 7ـی ئەیلوولی 2024 دەرچووە، کۆمپانیای "بیدکۆ" ئەرکی دابینکردنی پێداویستیی تاقیگەیی و ئەنجامدانی پشکنین بۆ نەخۆشخانە گشتییەکانی پێدراوە.

لە نووسراوەکەی سەرۆکایەتیی دیوانی ئەنجوومەنی وەزیراندا هاتووە کە کۆمپانیای ناوبراو لە هێنانی دەستەبەری بانکی (Bank Guarantee) بەیخشراوە.

وەزارەتی دارایی هەرێمی کوردستان بودجەیەکی تایبەتی بۆ جێبەجێکردنی ئەم گرێبەستە بۆ کۆمپانیای بیدکۆ تەرخان کردووە.

بەپێی گشتاندنێکی وەزارەتی تەندروستی لە 9ـی ئایاری 2024، کۆمپانیای "گڵۆبین فارما" کراوەتە تەنها سەرچاوەی دابینکردنی دەرمانی شێرپەنجە بۆ هەموو پارێزگاکانی هەرێم.

دۆخی خزمەتگوزارییە تەندروستییەکان:

سیستمی تەندروستیی هەرێمی کوردستان لە ئێستادا ڕووبەڕووی زنجیرەیەک قەیرانی قووڵ بووەتەوە کە کاریگەریی ڕاستەوخۆیان لەسەر ژیانی هاوڵاتییان هەیە. گرنگترین ئەو گرفتانەی ئێستا لەم کەرتەدا هەن بریتین لە:

کەمیی دەرمان و بەرزبوونەوەی نرخەکەی لە بازاڕەکاندا.

کەمبوونەوەی متمانە بە دامەزراوە حکومییەکان بەهۆی کەمیی پسپۆڕ و کارمەند.

نەکردنەوەی نەخۆشخانەی نوێ و پەککەوتنی خزمەتگوزارییە گشتییەکان.

نەبوونی سیستمێکی بیمەی تەندروستی و گرانیی نرخ لە نەخۆشخانە تایبەتەکاندا.

زیادبوونی هەڵەی پزیشکی و لاوازیی چاودێری لە ناوەندە تەندروستییەکاندا.

ئەم دوو گرێبەستەی کە دەست کەناڵ8 کەوتوون، ئاماژەن بۆ ئەوەی حکومەتی هەرێمی کوردستان لە بری دۆزینەوەی چارەسەری ڕیشەیی بۆ کەرتە گشتییەکە، خەریکی قۆرخکردنی دۆسیەی دەرمان و پشکنینەکانە بۆ بەرژەوەندیی کۆمپانیا تایبەتەکان، بەبێ ئەوەی مەرجە یاساییەکان ڕەچاو بکرێن.

زانیاری زیاتر بۆ تۆ

ڕێکخراوی ئاران ڕاپۆرتێکی بنکۆڵکاری سەبارەت بە کەرتی تەندروستی لە هەرێمی کوردستان بڵاو دەکاتەوە

لە کەلار هەڵمەتی کۆکردنەوەی واژۆ بۆ دامەزراندنی خۆبەخشانی کەرتی تەندروستی بەڕێوەچوو