پووختەی هەواڵەکە:

• ڕۆژی پێنجشەممە ئەنجوومەنی وەزارەتی پەروەردە دەستپێکی ساڵی نوێی خوێندن دیاری دەکات.

• لەمساڵدا بینای 32 خوێندنگەی نوێ تەواوکراون و ئامادەکراون بۆ خوێندن.

• شارەزایانی پەروەردە ئاماژە بە پێویستیی 2,000 بینای نوێ دەکەن بۆ نەهێشتنی فرەدەوامی.

• ڕێژەی دەرچوونی پۆلی 12ی ئامادەیی بەراورد بە ساڵی ڕابردوو دابەزینی تۆمارکردووە.

---

ڕۆژی پێنجشەممەی داهاتوو ئەنجوومەنی وەزارەتی پەروەردە وادەی فەرمیی زەنگی ساڵی نوێی خوێندن یەکلایی دەکاتەوە؛ ئەم بڕیارەش هاوکاتە لەگەڵ خستنەگەڕی 32 بینای نوێ لە کاتێکدا کەرتی پەروەردە لەبەردەم کورتهێنانی زیاتر لە 2,000 بینادایە بۆ نەهێشتنی سیستمی دوو دەوامی و سێ دەوامی بۆ زیاتر لە 1.8 ملیۆن خوێندکار.

---

ئامادەکاری و هەنگاوە فەرمییەکانی وەزارەتی پەروەردەی حکومەتی هەرێمی کوردستان :

• تەواوکردنی 32 بینای نوێ و بەرزبوونەوەی کۆی گشتیی خوێندنگەکان بۆ 7,617 بینا، کە 6,989ـیان حکومی و نزیکەی 360ـیان ئەهلین.

• گفتوگۆکردن لەگەڵ ئەنجوومەنی وەزیران بۆ دابینکردنی سەرجەم پێداویستییە سەرەکییەکانی کەرتی خوێندن.

• پلانڕێژی بۆ پێشوازیکردن لە 150 بۆ 160 هەزار خوێندکاری نوێ کە ساڵانە لە پۆلی یەکی بنەڕەتی وەردەگیرێن.

• بەڕێوەبردنی پڕۆسەی دەرچوونی 40 بۆ 60 هەزار خوێندکاری قۆناغی ئامادەیی بۆ زانکۆ و پەیمانگاکان.

کەمی باڵەخانەی خوێندن:

سەرپەرشتیاران و شارەزایانی بواری پەروەردە هۆشداری دەدەن لە کەمیی بینا؛ هەرێمی کوردستان پێویستی بە 2,000 خوێندنگەی دیکە هەیە بۆ کۆتاییهێنان بە قەرەباڵغیی ناو پۆلەکان لە کۆی 1,827,572 خوێندکار لە سەرجەم قۆناغەکاندا، هاوکات داتاکانی تاقیکردنەوەی پۆلی 12 بۆ ساڵی خوێندنی 2025-2026 دابەزینی ئاستی دەرچووان دەردەخەن، بەشێوەیەک لە کۆی 117,142 خوێندکار تەنیا 40,046 خوێندکار دەرچوون، لە کاتێکدا لە ساڵی پێشوودا لە کۆی 115,000 خوێندکار، 57,980 کەسیان دەرچوو بوون.

زانیاری زیاتر بۆ تۆ:

وەزارەتی پەروەردە گۆڕانکاریی لە 110 کتێبی خوێندندا کردووە

وەزارەتی پەروەردە: لەدایکبووانی 2020 دەچنە پۆلی یەک و کاتی تۆمارکردنیش دیاریکرا