پووختەی هەواڵەکە:

• لە شاری هەولێر زیاتر لە 20 پڕۆژەی نیشتەجێبوون بە تەواونەکراوی جێهێڵدراون یان کارەکانیان ڕاگیراون.

• بەدواداچوونی کەناڵ8 دەریخستووە زیاتر لە 6 هەزار یەکەی نیشتەجێبوون کێشەی تەواونەکردن و فرۆشتنی دووبارەیان هەیە.

• دەستەی وەبەرهێنان لە ماوەی 7 ساڵی ڕابردوودا مۆڵەتی لە 160 وەبەرهێنەر سەندووەتەوە.

• پسپۆڕانی خانووبەرە داوای دانانی هەژماری بانکیی گەرەنتیکراو دەکەن بۆ پاراستنی مافی کڕیاران.

---

زانیارییەک گەیشتووەتە کەناڵ8 کە زیاتر لە 20 پڕۆژەی نیشتەجێبوون لە هەولێر بەهۆی کارنەکردن یان بەجێهێشتنیان ڕووبەڕووی وەرگرتنەوەی مۆڵەت دەبنەوە، لە کاتێکدا چارەنووسی هەزاران کڕیار بە نادیاری ماوەتەوە. بەشێک لەم پڕۆژانە نزیکەی 16 ساڵە پارەی هاوڵاتییانیان وەرگرتووە و تەواو نەکراون، لە هەمان کاتدا سەدان دۆسیەی فرۆشتنی یەک یەکە بە چەند کەسێک لە دادگاکاندا یەکلانەکراونەتەوە.

---

کێشەی پڕۆژەکان و کڕیاران (بەدواداچوونی کەناڵ8 و بۆچوونی پسپۆڕان)

• تەنیا لە یەک پڕۆژەی تەواونەکراوی هەولێردا دوای 16 ساڵ، چارەنووسی 427 ڤێلا، 1122 شوقە و نزیکەی 200 ملیۆن دۆلاری هاوڵاتییان بە نادیاری ماوەتەوە.

• بەپێی بەدواداچوونی کەناڵ8، لە ئێستادا لە هەولێر زیاتر لە 6 هەزار خانوو و یەکەی نیشتەجێبوون کێشەی وەستانی کارکردنیان هەیە سەرەڕای وەرگرتنی پارە لە خەڵک.

• بەشێک لە یەکە تەواونەکراوەکان کێشەی یاساییان هەیە و یەک خانوو یان شوقە بە 2 کڕیار یان زیاتر فرۆشراوە و دۆسیەکانیان لە دادگاکانن.

• هێرش فارس، ڕاوێژکاری کەرتی خانووبەرە ئاماژە بەوە دەکات دەبێت هەژمارێکی بانکیی گەرەنتیکراو لە نێوان وەبەرهێنەر و کڕیاردا هەبێت تاوەکو لە کاتی تەواونەکردنی پڕۆژەدا مافی هاوڵاتی پارێزراو بێت.

دەستەی وەبەرهێنانی هەرێمی کوردستان

محەممەد شوکری، سەرۆکی دەستەی وەبەرهێنان ئاشکرای کردووە کە لە ماوەی 7 ساڵی ڕابردوودا زیاتر لە 900 پڕۆژەی نیشتەجێبوون مۆڵەتی دروستکردنیان پێدراوە، بەڵام بەهۆی کێشە، سستی و تەواونەکردنی کارەکانیان، دەستەکە مۆڵەتی لە 160 وەبەرهێنەر وەرگرتووەتەوە؛ ئێستاش هەر پڕۆژەیەک کارەکانی ڕاگیرابێت، ڕاستەوخۆ دەستی بەسەردا دەگیرێت و لە وەبەرهێنەرەکەی وەردەگیرێتەوە.

زانیاری زیاتر بۆ تۆ

قیستی 70%ـی پڕۆژەکانی نیشتەجێبوونی سلێمانی بە داشکاندنەوە وەردەگیرێت

ئەنجوومەنی وەزیرانی عێراق بڕیاری لەسەر بەرهەمی کشتوکاڵی و دەرمان و نیشتەجێبوون دەرکرد

پڕۆژەی وەهمی و وادەی درۆینە؛ قەیرانی نیشتەجێبوون لە هەولێر گەیشتە دادگا