پووختەی هەواڵەکە:

• شانەی ڕاگەیاندنی ئەمنیی عێراق داخستنی چەند دەروازەیەکی سنووریی لەگەڵ ئێران ڕاگەیاند.

• هۆکاری بڕیارەکە بۆ گرتنەبەری ڕێکاری ئەمنی و لێکۆڵینەوە لە پێشێلکارییەکان دەگەڕێتەوە.

• دەسەڵاتدارانی عێراق دەڵێن دەروازەکانی زڕباتییە و مونزرییە بۆ هاتووچۆی گەشتیاران کراوەن.

• بەرەبەیانی ئەمڕۆ بە بڕیاری عەلی زەیدی دەروازەی شەلامچە بە تەواوی داخرا.

---

حکومەتی عێراق بەهۆی گرتنەبەری زنجیرەیەک ڕێکاری بەپەلەی ئەمنی و کارگێڕی، چەند دەروازەیەکی سنووریی لەگەڵ کۆماری ئیسلامیی ئێران داخستووە. ئەم هەنگاوە دوای بڕیاری سەرۆکوەزیران هات بۆ داخستنی دەروازەی شەلامچە، هاوکات دەزگا هەواڵگرییەکان دەستیان بە لێکۆڵینەوەیەکی ورد کردووە لەسەر بوونی سەرپێچی و پێشێلکاریی ئەمنی لە خاڵە سنوورییەکاندا.

---

ڕاگەیەندراوی شانەی ڕاگەیاندنی ئەمنیی عێراق

• لایەنە ئەمنییەکان دەستیانکردووە بە جێبەجێکردنی ڕێکاری کارگێڕی و ئەمنی لە چەند دەروازەیەکی سنووری و بەو هۆیەوە دەروازەکان داخراون.

• ڕێکارە یاساییەکان و بەدواداچوونی هەواڵگری چڕکراونەتەوە بۆ لێکۆڵینەوە لە وردەکاریی ئەو سەرپێچییانەی لەو دەروازانەدا ڕوویانداوە.

• ئامانجی سەرەکیی ئەم ڕێکارانە دانانی چارەسەری پێویستە بۆ کۆنترۆڵکردنی دۆخی سنوورەکان و ڕێگریکردن لە پێشێلکاری.

دۆخی دەروازە کراوە و داخراوەکان

ئەم ڕێکارە ئەمنییانە لە کاتێکدایە کە بەرەبەیانی ئەمڕۆ بە فەرمانی عەلی زەیدی، سەرۆکوەزیرانی عێراق، دەروازەی سنووریی شەلامچە لەگەڵ ئێران داخرا و سەرجەم فەرمانبەر و کارمەندانی نێردرانەوە ماڵەوە؛ سەرەڕای داخستنی ئەم دەروازانە، شانەی ڕاگەیاندنی ئەمنی هاوڵاتییان و گەشتیارانی ئاگادارکردووەتەوە کە لە ئێستادا هەردوو دەروازەی سنووریی زڕباتییە و مونزرییە بە کراوەیی ماونەتەوە و هاتووچۆی گەشتیاران تێیاندا ئاساییە.

زانیاری زیاتر بۆ تۆ

دەروازەسنوورییەکانی عێراق: داهاتی دەروازە سنوورییەکان 2.5 تریلیۆن دیناری تێپەڕاند

عەلی زەیدی: ڕێکاری توند دژی گەندەڵیی دەروازە سنوورییەکان دەگرێتەبەر

دەروازە سنوورییەکانی هەرێم بە ئەلیکترۆنی دەکرێن و داهاتەکەیان دابەش دەکرێت

سعودیە: لە عێراقەوە هێرشکرایە سەر هێڵى نەوتى ڕۆژهەڵات-ڕۆژئاوا