پووختەی هەواڵەکە

• لە دانیشتنی ئەمڕۆی دادگای سلێمانیدا وتە لە لاهوور جەنگی و پۆڵاد جەنگی و ڕێبواری حامیی حاجی غالی لەسەر هەوڵی کوشتنی بافڵ تاڵەبانی وەرگیرا.

• ڕێبواری حامیی حاجی غالی و ڕێبواری قودرەت دانیان بەوەدا نا کە لە شوقەیەکی بەرامبەر دەباشان ئامادەکارییان بۆ تەقەکردن لە بافڵ تاڵەبانی کردووە.

• پۆڵاد جەنگی و لاهوور جەنگی تۆمەتەکانیان ڕەتکردەوە، بەڵام بەڵگەنامەکان و دانپێدانانی تۆمەتبارانی دیکە هەماهەنگییان لەگەڵ ئەژی ئەمین پشتڕاستدەکەنەوە.

---

بەگوێرەی زانیارییەکانی کەناڵ8 گەیشتووە لە زاری کەسانی یاسایی ئامادەبووی دادگای سلێمانی، ئەمڕۆ لێکۆڵینەوە لەگەڵ لاهوور جەنگی، پۆڵاد جەنگی، ڕێبواری حامیی حاجی غالی و چەند تۆمەتبارێکی دیکە سەبارەت بە هەوڵی کوشتنی بافڵ جەلال تاڵەبانی ئەنجامدرا.

---

دانپێدانانەکانی ناو هۆڵی دادگا لەسەر هەوڵی تیرۆرکردنەکە

• ڕێبواری قودرەت لەبەردەم دادوەر تەندروستیی دەروونیی خۆی پشتڕاستکردەوە و پێداگری لەسەر تەواوی دانپێدانانەکانی پێشووی بۆ کوشتنی سەرۆکی یەکێتی کردەوە.

• ڕێبواری حامیی حاجی غالی دانیناوە بە هەبوونی درۆن و چەکی قەناس لە شوقەیەکی سیتی تاوەر کە بەرامبەر ماڵی بافڵ تاڵەبانی بووە.

• ڕێبواری حامیی حاجی غالی ئاشکرایکرد بۆ ئەوەی بافڵ تاڵەبانی نەکوژرێت، دەستکاریی دووربینی قەناسەکەی کردووە تاوەکو ڕێبواری قودرەت نەتوانێت لە کاتی دیاریکراودا تەقە بکات.

• هەردوو ڕێبوارەکە دووپاتیانکردەوە ڕاسپێردراون بۆ کوشتنی بافڵ تاڵەبانی، بەڵام هیچ کامیان نیەتی جێبەجێکردنی ئەو فەرمانەی لاهوور جەنگی و ئەژی ئەمینیان نەبووە.

بەرگری و وەڵامەکانی لاهوور جەنگی و پۆڵاد جەنگی

لە دانیشتنەکەدا پۆڵاد جەنگی هەوڵیدا لە دانپێدانانی پێشووی پاشگەزببێتەوە بە پاساوی وەرگرتنی ماددەی هێورکەرەوە لە کاتی برینداربوونیدا، بەڵام بەڵگەنامە پزیشکییەکان و تۆماری کامێراکانی چوونە ناو شوقەکە قسەکانیان ڕەتکردەوە؛ هاوکات لاهوور جەنگیش سەرەڕای ڕەتکردنەوەی هەوڵی کوشتنەکە، لەبەردەم دادوەر دانی بەوەدا نا کە لەگەڵ ئەژی ئەمین کۆبووەتەوە و داوای چەکی قورس، دۆشکەچی و قەناس بەدەستی لێکردووە.

دانپێدانانی هاوکارانی ئەژی ئەمین لەسەر بەکارهێنانی درۆن

لە بەشێکی دیکەی دانیشتنەکەدا، پێشەوا و بۆتان کە سەر بە هێزەکانی ئەژی ئەمین بوون و لە شوقەکەدا ئامادەییان هەبووە، دانیان بە پلانەکەدا نا؛ بۆتان بە فەرمی لە دادگا داوای لێبوردنی کرد و ڕایگەیاند لە ترسی هەڕەشەکانی ئەژی ئەمین بۆ سەر کەسوکاری لە سۆران وتەکانی پێشووی شاردووەتەوە، بەڵام دانی بەوەدا نا کە ئەرکی ئامادەکردنی درۆنەکانی لەو هەوڵەدا لە ئەستۆ بووە.

زانیاریی زیاتر لەسەر بابەتەکە

ئەم دانیشتنەی دادگای سلێمانی لە ڕۆژی پێنجشەممە، 17ـی ئەیلولدا بەڕێوەچوو، تێیدا ڕێبواری حامیی حاجی غالی ئاشکرایکرد کە پێشتر لە ماڵی لاهوور جەنگی چاوی بە ئەژی ئەمین کەوتووە، هەروەها لاهوور جەنگیش لە بەردەم دادوەر ئاماژەی بەوەکرد بکوژانی موراد کانی کوردەیی سەردانی ماڵەکەی ئەویان کردووە؛ بەمەش تاوەکو ئێستا چوار تۆمەتبار لەبەردەم دادوەردا بە تەواوی دانیان بە هەوڵی کوشتنی بافڵ جەلال تاڵەبانیدا ناوە.

زانیاریی زیاتر بۆ تۆ

کەناڵ8 نوێترین زانیاریی لەبارەى دۆسیەى لاهور شێخ جەنگی بڵاودەکاتەوە

دادگاییکردنی لاهوور جەنگی بورهان و 11 هاوڕێی لە سلێمانی بەڕێوەدەچێت