پووختەی هەواڵەکە:

• دۆناڵد ترەمپ، سەرۆکی ئەمریکا پاکێجێکی نوێی سزای توندی بەسەر کەرتی وزە و سوپای ڕووسیادا واژۆ کرد.

• یاساکە دەسەڵات دەداتە سەرۆکی ئەمریکا تاوەکو 100% باجی گومرگی بەسەر کڕیارانی نەوتی مۆسکۆدا بسەپێنێت.

• بۆ یەکەمجار کەشتیگەلی سێبەری مۆسکۆ و ڤلادیمیر پوتین دەخرێنە ناو لیستی سزاکانی واشنتنەوە.

• واژۆکردنی یاساکە لە کۆنگرێس هەفتەیەک پێش دیداری چاوەڕوانکراوی نێوان ترەمپ و سەرۆکی چین دێت.

---

واژۆکردنی یاسای سزاکانی سەر ڕووسیا لەلایەن دۆناڵد ترەمپەوە ڕاستەوخۆ دەست دەخاتە سەر کڕیارە گەورەکانی نەوتی مۆسکۆ بەتایبەت چین و هیندستان. ئەم هەنگاوەی کۆشکی سپی بۆ ناچارکردنی کرێملینە بە قبوڵکردنی دانوستانەکانی ڕاگرتنی جەنگ، لە کاتێکدا نێردە تایبەتەکانی ئەمریکا لە گەشتدان لەنێوان مۆسکۆ و کیێڤ. لە هەمان کاتدا، سەپاندنی باجی 100% گرژییە ئابوورییەکان پێش لوتکەی سەرکردەکانی واشنتن و پەکین دەگەیەنێتە لوتکە.

---

بڕیارە سەرەکییەکانی پاکێجی نوێی سزاکانی ئەمریکا:

• بەئامانجگرتنی کەشتیگەلی سێبەر (Shadow Fleet) کە مۆسکۆ بۆ خۆدزینەوە لە سزاکانی ڕۆژئاوا بە ئاڵای وڵاتانی دیکە بەکاریاندەهێنێت.

• دەسەڵاتپێدانی یاسایی بە سەرۆکی ئەمریکا بۆ سەپاندنی باجی گومرگی تاوەکو 100% بەسەر هاوردەکارە سەرەکییەکانی نەوت و گازی ڕووسیا.

• سەپاندنی سزای ڕاستەوخۆ بەسەر ڤلادیمیر پوتین، بەرپرسانی باڵای ڕووسیا و سەرجەم ئەو قەوارە بیانییانەی پاڵپشتی لە سوپای ڕووسیا دەکەن.

• پەسەندکردنی پڕۆژەیاساکە لە ئەنجوومەنی نوێنەران بە 262 دەنگی بەڵێ بەرامبەر 159 دەنگ بە ناوی سیناتۆری کۆچکردوو لینزی گراهام.

کاردانەوە نێودەوڵەتییەکان و ئاڵۆزییە دیپلۆماسییەکان:

ڤۆلۆدیمیر زێلێنسکی، سەرۆکی ئۆکرانیا پێشوازیی لە پەسەندکردنی یاساکە کرد و سوپاسی کۆنگرێسی ئەمریکای کرد، لە کاتێکدا هیندستان پێداگری لەسەر بەردەوامیی کڕینی نەوت لە سەرچاوە جۆراوجۆرەکان دەکاتەوە. ئەم پێشهاتانە لە کاتێکدان کە هەردوو نێردەی تایبەتی ترەمپ، ستیڤ ویتکۆف و جارید کۆشنەر لە گفتوگۆی بەردەوامدان لەگەڵ بەرپرسانی مۆسکۆ و کیێڤ، هاوکات بڕیارە هەفتەی داهاتوو دیداری لوتکە لەنێوان ترەمپ و شی جینپینگ، سەرۆکی چین لە واشنتن بەڕێوەبچێت کە تێیدا دۆسیەی کڕینی وزەی ڕووسیا بابەتی ناکۆکیی سەرەکی دەبێت.

زانیاری زیاتر بۆ تۆ:

ترەمپ: ئێران لە پشت هێرشەکانی سەر بۆرییە نەوتییەکانی سعودیەوە بووە