لە دراماوە بۆ واقیع؛ بۆچی سیناریستی "دۆڵی گورگەکان" لەسەر دۆسیەی کوشتنی ئەفسەرێکی میت زیندانی دەکرێت؟

پووختەی هەواڵەکە:

دوای 15 ساڵ لە گیانلەدەستدانی کاشف کۆزینۆغڵو، کارمەندی پێشووی دەزگای میت لە گرتووخانە، لێکۆڵینەوە لە دۆسیەکەی دەستیپێکردەوە.

دادگای تورکیا فەرمانی بەندکردنی بۆ 8 کەس دەرکردووە کە یەکێکیان بەڕێوەبەری پێشووی ئاسایش و سیناریستی زنجیرەی "دۆڵی گورگەکان"ە.

پەخشکردنی سیناریۆی کوشتنی کەسایەتییەکی هاوشێوەی کۆزینۆغڵو لە ئەڵقەی 136ـی زنجیرەکەدا، گومانی گەورەی لەسەر سیناریستەکان دروستکردووە.

دەسەڵاتی دادوەری بڕیاری هەڵدانەوەی گۆڕی کارمەندەکەی میتی داوە تاوەکو بەڵگە نوێیەکان لەگەڵ تۆمارە پزیشکییەکان بەراورد بکرێن.

لێکۆڵینەوە لە گیانلەدەستدانی گوماناویی کارمەندێکی پێشووی دەزگای هەواڵگریی تورکیا (میت)، پەردە لەسەر پەیوەندییەکی نهێنیی نێوان درامای بەناوبانگی "دۆڵی گورگەکان" و تاوانە بکەرنادیارەکان لادەدات؛ بەجۆرێک دوو ڕۆژ بەر لە مردنی ئەو بەرپرسەی میت لە گرتووخانە، سیناریۆی کوشتنەکەی لە یەکێک لە ئەڵقەکانی دراماکەدا نمایشکراوە.

ڕێکار و تۆمەتەکانی لایەنی داواکاری گشتیی تورکیا:

لە چوارچێوەی لێکۆڵینەوە لە تاوانە بکەرنادیارەکان، زیاتر لە 20 کەس دەستگیرکراون و فەرمانی بەندکردن بۆ 8 کەس دەرکراوە کە پێکهاتوون لە کارمەندێکی پێشووی میت، دوو داواکاری گشتی، دوو ڕۆژنامەنووس و دوو کارمەندی فریاگوزاری.

تۆمەتبارەکان بە تۆمەتەکانی "کوشتنی ئەنقەست"، "ئەندامبوون و بەڕێوەبردنی ڕێکخراوی تیرۆریستیی چەکدار"، "ئاشکراکردنی زانیاری و بەڵگەنامەی هەواڵگری" و "دەستکەوتنی نایاسایی زانیارییە کەسییەکان" ڕووبەڕووی دادگا کراونەتەوە.

دادگا بڕیاری داوە گۆڕی کاشف کۆزینۆغڵو هەڵبدرێتەوە، تاوەکو پشکنین بۆ نموونەی ئێسک و خاکی گۆڕەکەی بکرێت و بەڵگەکان لەگەڵ تۆماری کامێرای چاودێریی گرتووخانەکە و بەڵگەنامەکانی نەخۆشخانە بەراورد بکرێن.

تێوەگلانی ستافی درامای دۆڵی گورگەکان:

لە بەرامبەردا، تیمی درامای دۆڵی گورگەکان کەوتوونەتە ناو تۆمەتەکانەوە؛ لە ڕۆژی 23ـی ئەیلوولدا بەڕێوەبەرێکی پێشووی ئاسایش کە هاوکات سیناریستی زنجیرەکە بووە، فەرمانی بەندکردنی بۆ دەرکراوە، هەروەها پێشتریش سێ سیناریستی دیکەی زنجیرەکە وەک "خاوەن زانیاری" بۆ گوتەلێوەرگرتن بانگهێشتی دادگا کراون. هۆکاری سەرەکیی گومانەکانیش بۆ ئەڵقەی 136ـی دراماکە دەگەڕێتەوە کە لە 10ـی تشرینی دووەمی 2011 پەخشکرا، تێیدا کەسایەتییەک بە ناوی "کازم کاشفۆغڵو" کە هاوشێوەی ناوی کارمەندەکەی میت بووە، لەنێو ژووری گرتووخانەدا هەڕەشەی کوشتنی لێ دەکرێت.

کاشف کۆزینۆغڵو لە 12ـی تشرینی دووەمی 2011دا، واتە تەنیا دوو ڕۆژ دوای پەخشکردنی ئەو ئەڵقەیە، لە گرتووخانەی سیلیڤری بە شێوەیەکی گوماناوی گیانی لەدەستدا. دۆسیەی ناوبراو دوای 15 ساڵ لە ڕێگەی لێکۆڵینەوە لە تاوانە بکەرنادیارەکان کراوەتەوە، ئەمەش بەهۆی گومانی ئەوەی کە زانیارییە هەواڵگرییەکان پێشوەختە دراونەتە ستافی دراماکە تا سیناریۆی کوشتنەکەی دابڕێژن.

زانیاری زیاتر بۆ تۆ:

نامەی بەپەلەی بەغداد بۆ ئەردۆغان: هێزەکانتان لە باشیک بکشێننەوە