پووختەی هەواڵەکە:

• پڕۆژەی ڕووناکی سزای دارایی بەسەر بەشێک لە هاوبەشانی کارەبادا سەپاندووە.

• هاووڵاتییان و یاساناسان ئاماژە بە هەڵەی پسوولە و تێکەڵبوونی هێڵەکان دەکەن.

• خاوەنکاران بە کورتەنامە ئاگادارکراونەتەوە کە دەبێت پارەی کارەبای ساڵی 2023 بگەڕێننەوە.

• بڕی پارەی داواکراو لە پرۆژە بازرگانییەکان لە نێوان 3 تاوەکو 130 ملیۆن دیناردایە.

---

زانیاریی گەیشتووە بە کەناڵ8 کە جێبەجێکردنی پڕۆژەی ڕووناکی بۆ دابینکردنی کارەبای 24 کاتژمێری، ڕووبەڕووی ناڕەزایەتیی هاووڵاتییان و بازرگانان بووەتەوە بەهۆی سەرهەڵدانی کێشەی تەکنیکی و سەپاندنی سزای دارایی، لە کاتێکدا ڕۆژانە سکاڵای جۆراوجۆر لە بەڕێوەبەرایەتییەکانی کارەبا تۆمار دەکرێن.

---

هاووڵاتییان و پارێزەران دەربارەی گرفتەکانی پڕۆژەی ڕووناکی دەڵێن:

• هاوبەشانی کارەبا سەرەڕای پێدانی پارەی مانگانە، بە تۆمەتی ڕاکێشانی نایاسایی هۆشداریی بڕینی کارەبا و سزای 600 هەزار دینارییان بۆ هاتووە.

• هاووڵاتییان بەڵگەی فەرمیی پارەدانی مانگانەیان پێیە، بەڵام ڕووبەڕووی هەڵەی کارگێڕی بوونەتەوە لە تۆمارکردنی پێوەرەکانیاندا.

• دیارترین گرفتەکان بریتین لە بەرزبوونەوەی پارەی کارەبا، تێکەڵبوونی هێڵی ماڵان، هەڵە تۆمارکردنی خانووەکان و کێشەی سیستمی تەکنیکی.

• گۆران محەممەد، پارێزەر ئاماژە بەوە دەکات مامەڵە و سکاڵای هاووڵاتییان لەسەر ئەم پرۆژەیە زۆرە و چارەسەرکردنی کێشە تەکنیکییەکان کاتی پێویستە.

ڕێکارەکانی پڕۆژەی ڕووناکی و داواکاری لە کەرتی بازرگانی:

لە لایەکی دیکەوە، ئیدارەی پڕۆژەی ڕووناکی لە ڕێگەی کورتەنامەوە خاوەنی پڕۆژە بازرگانییەکان، مارکێت و کۆگاکانی ئاگادارکردووەتەوە کە لە ساڵی 2023ـەوە پارەی کارەباکەیان بە هەڵە و کەمتر لە بڕی دیاریکراو بۆ هەژمارکراوە؛ بەگوێرەی کورتەنامەکان، پێویستە ئەو خاوەنکارانە پارە پاشەکەوتکراوەکان بگێڕنەوە بۆ بەڕێوەبەرایەتیی کارەبا، کە بەپێی داهات و قەبارەی پڕۆژەکان بڕی ئەو پارەیە لە 3 ملیۆن دینارەوە دەستپێدەکات تاوەکو 130 ملیۆن دینار.

پێشینە و ئامانجی سەرەتایی پڕۆژەکە:

پڕۆژەی ڕووناکی وەک هەنگاوێکی حکومەت بۆ دابینکردنی کارەبای بەردەوامی 24 کاتژمێری لە ڕێگەی پێوەری زیرەکەوە ڕاگەیەندرا بە ئامانجی ڕێکخستنەوەی خەرجی و دابەشکردنی وزە، بەڵام لەگەڵ فراوانبوونی پرۆسەکەدا، کێشەی تەکنیکی و هەڵەی سیستمی هەژمارکردنی پارە وایکردووە کێشەی یاسایی و کارگێڕی لەنێوان بەشداربووان و بەڕێوەبەرایەتییەکانی کارەبادا دروستببێت.

زانیاری زیاتر بۆ تۆ:

پەرمانتارێک بۆ وەزیرى کارەبا: داهاتی فرۆشتنی 1,500 میگاوات کارەبا و پرۆژەی ڕووناکی بۆ کوێ دەچێت؟