پووختەی هەواڵەکە:

• لە شارەدێی پردێ دژی کوژرانی دوو هاووڵاتیی مەدەنی خۆپیشاندان کرا.

• خۆپیشاندەران بۆ ماوەیەک ڕێگای سەرەکیی نێوان کەرکووک و هەولێریان داخست.

• لیژنەیەکی باڵای سەرۆکایەتیی ئەنجوومەنی وەزیران بۆ لێکۆڵینەوە دێتە کەرکووک.

• سەرۆکی دەزگای دژەتیرۆری عێراق بە فەرمی داوای لێبووردن و قەرەبوو دەکاتەوە.

---

کوژرانی دوو گەنج لە کاتی ئۆپراسیۆنی هێزەکانی دژەتیرۆری عێراق لە شارەدێی پردێ، ناڕەزایەتیی بەرفراوانی لێکەوتووەتەوە و هاووڵاتییان ڕێگای سەرەکیی کەرکووک-هەولێریان داخست، لە کاتێکدا لایەنە فەرمییەکان دەستپێکردنی لێکۆڵینەوە لە کەمتەرخەمیی سەربازی ڕادەگەیەنن.

---

داواکارییەکانی خۆپیشاندەران و هەڵوێستی پەرلەمانتاران:

• خۆپیشاندەران و نوێنەرانی پەرلەمان لە پردێ داواکارییەکانیان خستەڕوو:

• ناڕەزایەتی بەرامبەر شێوازی جێبەجێکردنی ئۆپراسیۆنەکەی هێزەکانی دژەتیرۆر لەناو گەڕەکە مەدەنییەکاندا دەربڕدرا.

• داوا لە سەرۆکوەزیرانی عێراق کرا لێکۆڵینەوەی ورد بکات و ئەو کەسانەی کەمتەرخەم بوون سزا بدرێن.

• خۆپیشاندەران پێداگرییان لەسەر گەڕاندنەوەی مافی یاسایی و قەرەبووکردنەوەی کەسوکاری قوربانییەکان کردەوە.

• مازن غەریب، ئەندامی لیژنەی ئاسایش لە پەرلەمان ڕایگەیاند کە ڕووداوەکە هەڵەیەکی گەورە بووە و سەرجەم بەرپرسانی کورد لەسەر هێڵن.

• خۆپیشاندەران سەرلەبەیانی ئەمڕۆ پاش گەیاندنی پەیامەکانیان کۆتاییان بە گردبوونەوەکە هێنا و شەقامەکانیان پاککردەوە.

ڕێکارەکانی حکومەت و لێکۆڵینەوە لە کەمتەرخەمی:

لە بەرامبەر ناڕەزایەتییەکاندا، بڕیار دراوە لیژنەیەکی باڵای لێکۆڵینەوە لە سەرۆکایەتیی ئەنجوومەنی وەزیرانی عێراقەوە سەردانی کەرکووک بکات بۆ دیاریکردنی هۆکاری کەموکوڕییەکان؛ هاوکات فەرماندەیی ئۆپراسیۆنەکانی کەرکووک ڕاپۆرتێکی تێروتەسەلی لەبارەی چۆنیەتیی ڕووداوەکە بۆ سەرووی خۆی بەرزکردووەتەوە، بڕیاریشە سەرۆکی دەزگای دژەتیرۆری عێراق سەردانی ناوچەکە بکات بۆ داوای لێبووردن لە کەسوکاری قوربانییەکان و قەرەبووکردنەوەی زیانەکان.

پێشینەی ئۆپراسیۆنەکە لە شارەدێی پردێ:

ئەم گرژییە دوای ئەوە هات کە لە چەند ڕۆژی ڕابردوودا هێزەکانی دژەتیرۆری عێراق ئۆپراسیۆنێکیان دژ بە سێ چەکداری داعش لەناو شارەدێی پردێ ئەنجامدا، بەڵام لە کاتی ڕووبەڕووبوونەوەکەدا دوو گەنجی مەدەنی گولـلەیان بەرکەوت و گیانیان لەدەستدا؛ ئەمەش نیگەرانیی دانیشتووانی سنوورەکەی لێکەوتەوە و داوا دەکەن هێزە ئەمنییەکان لە کاتی ئۆپراسیۆنەکاندا پاراستنی گیانی هاووڵاتییان بکەنە لەپێشینەی پلانەکانیان.

زانیاری زیاتر بۆ تۆ:

ڕێبوار تەها: لیژنەیەک بۆ لێکۆڵینەوە لە ڕووداوەکەی پردێ پێکهێنرا