لە تورکیا ڕێژەی هەڵاوسان بۆ مانگی ئەیلوول ڕاگەیێنرا
پووختەی هەواڵەکە
- بەگوێرەی ئاماری فەرمیی تورکیا هەڵاوسان بۆ خوار 30% دابەزیوە
- ماوەی نزیکەی پێنج ساڵە هەڵاوسان بۆ ئەو ڕێژەیە دانەبەزیوە
ژمارەکانی هەڵاوسان لە تورکیا بۆ مانگی ئەیلوول بڵاوکرانەوە، جیاوازیی نێوان ئاماری فەرمیی و ئاماری سەربەخۆ نزیکەی 17%ـە. بەگوێرەی داتای فەرمیی هەڵاوسان 29.73%ـیە بەڵام بەگوێرەی داتاکانی ئاماری ئابووریناسانی سەربەخۆ 46.61%ـە.
دامەزراوە تایبەتمەندەکانی تورکیا:
- دامەزراوەی ئاماری تورکیا (تویک) :هەڵاوسان لە وڵاتەکە لە مانگی ئەیلوولدا 1.84% زیادیکردووە و بووەتە 29.73%.
- هاوکات گرووپی سەربەخۆی لێکۆڵینەوە لە هەڵاوسان (ئەناگ) ئاماری هەمان مانگی بڵاوکردووەتەوە و دەڵێت هەڵاوسان لە مانگی ئەیلوولدا 2.10% زیادیکردووە و گەیشتووەتە 46.61%.
- بە گوێرەی ئامارە فەرمییەکان، هەڵاوسان لە مانگی ئابدا 31.51% و بەگوێرەی ئەناگ 49.03% بوو.
- بەگوێرەی ڕاپرسییەک کە لەلایەن ئاژانسی بلومبێرگ لەگەڵ 19 دەزگای جیاجیا ئەنجامدراوە، چاوەڕواندەکرا هەڵاوسان لە مانگی ئەیلوولدا 2.20% زیادبکات و ببێتە 30.30%.
- بەگوێرەی هەمان ڕاپرسی هەڵاوسان لە کۆتایی ساڵی 2026دا دەبێتە 29.7% و بۆ ساڵی 2027 پێشبینییان کردووە ببێتە 24%.
هەڵاوسان نرخی خواردنی فڕاندووە
بەگوێرەی ئامارە فەرمییەکان زۆرترین هەڵاوسان جارێکی دیکە لە کاڵا بنەڕەتییەکاندا بووە، لە کەرتی خۆراک و خواردەمەنییە ناکحولییەکاندا ڕێژەی هەڵاوسان 27.62%ـە، هەڵاوسان لە گواستنەوەدا بەڕێژەی 35.10% و لە کەرتی نیشتەجێبوون، ئاو، کارەبا و سووتەمەنییشدا 39.99%ـیە.
دوایین جار هەڵاوسان لە تورکیا لە مانگی تشرینی دووەمی 2021دا واتە بەر لە نزیکەی پێنج ساڵ بۆ خوار 30% دابەزی و دواتر تاوەکو نزیکەی 65% بەرزبووەوە.
حکومەت چی دەکات؟
حکومەتی تورکیا سیاسەتێکی دژەهەڵاوسان پەیڕەو دەکات و پلانی هەیە لە کۆتایی 2027دا هەڵاوسان بۆ 21%، لە کۆتایی 2028دا بۆ 13.5% و لە کۆتایی 2029دا بۆ 9% داببەزێنێت. ئەگەرچی سیاسەتی ئەنقەرە بۆ دژەهەڵاوسان ناوە، لەجیاتی نزمکردنەوەی ڕێژەکە، بەهۆی فاکتەرە جیاجیاکان لەسەر ئاستی ئابووریی جیهان و ناوچەکە، ناتوانێت هەڵاوسان لەژێر کۆنترۆڵدا بهێڵێتەوە.
زانیاری زیاتر بۆ تۆ
53 خولەک پێش ئێستا