ئاسایشی هەولێر: سەنعان بە ڕووداوى هاتوچۆ گیانى لە دەستداوە نەک بە تەور
کیژان مەحمود 3 کاتژمێر پێش ئێستا
پووختەى هەواڵەکە
- تەرمى سەنعان عەبدولرەحمان لەسەر ڕێگەى هەولێر-شەقڵاوە دۆزرابووەوە.
- بەڕێوەبەرایەتیی ئاسایشی هەولێر ڕەتیکردەوە سەنعان بە تەور کوژرا بێت.
بەڕێوەبەرایەتیی ئاسایشی هەولێر لە ڕوونکردنەوەیەکدا ساتى ڕووداوەکەى لە ديمەنى کامێراکانى چاودێرى و دەستگیرکردنى تۆمەتبارەکە بڵاوکردەوە.
ڕۆژی چواری تشرینی یەکەمی 2026 لە ڕێگای هەولێر -شەقڵاوە، نزیک گوندی بانەمان، تەرمی هاونیشتمانییەک بەناوی (سەنعان عەبدولرەحمان تەها) دۆزرایەوە و دواتر لەلایەن تیمەکانی تاوانی بەڕێوەبەرایەتیی ئاسایشەوە لەگەڵ لایەنە پەیوەندیدارەکان لێکۆڵینەوە دەستیپێکرد.
ڕوونکردنەوەى ئاسایشی هەولێر:
- لە پاش لێکۆڵینەوە دەرکەتووە ئۆتۆمبێلێکی بارهەڵگر خۆی بەو هاونیشتمانییەدا کێشاوە
- دواتر تەرمەکەی بەجێهێشتووە و هەڵاتووە.
ئاسایشی هەولێر دەڵێت "ناسنامەی شۆفێری بارهەڵگرەکە ئاشکرا کراوە و بە بڕیاری دادوەری لێکۆڵینەوەی ئاسایشی هەولێر، تۆمەتبار دەستگیر کراوە و لێکۆڵینەوەکان لەگەڵیدا بەردەوامن".
دوێنێ کاتێک هەواڵەکە بڵاوکرایەوە لە هەندێک دەزگاى میدیاى بانگەشەى ئەوە کرا "سەنعان عەبدولرەحمان" بە تەور کوژراوە و شوێنەوارى چەقۆ و تەور بە جەستەیەوە دیارە.
زانیارى زیاتر بۆ تۆ
کیژان مەحمود
3 کاتژمێر پێش ئێستا