پووختەى هەواڵەکە

• شاندی باڵای دانوستانکاری حکومەتی کاربەڕێکەرى هەرێمی کوردستان لە بەغدادە.
• بەشێوەیەکى فەرمى کۆبوونەوەکانى لەگەڵ حکومەتى فیدراڵ دەستپێدەکات.
• بودجە و پشکى هەرێمى کوردستان کارنامەى سەرەکییە.

---

هەرێم کەمال ئاغا، سەرۆکى فراکسیۆنى یەکێتی، لە ئەنجوومەنى نوێنەرانى عێراق لە میانى بەشداریکردنى لە بوڵتنى هەواڵەکانى کەناڵ8 ڕایگەیاند، شاندی باڵای دانوستانکاری حکومەتی کاربەڕێکەرى هەرێمی کوردستان لە دوێنێوە لە بەغدادن و ئەمڕۆ کاتژمێر 2:00ـى دوانیوەڕۆ کۆبوونەوەکانى دەستپێبکات.

---

ئاماژەى بەوەشکرد، شاندەکە تاوتوێى داخوازییەکانى کورد و جێگیرکردنیان دەکات، سەبارەت بە پابەندییەکان و ماف و شایستەکانی هەرێمی کوردستان لە بودجەی گشتیی فیدراڵیی عێراق بۆ ساڵی 2027 و جێگیرکردنیان.

ئامانجى شاندەکە:

• بە هەماهەنگی لەگەڵ نوێنەرەانى کورد لە دەسەڵاتە فیدڕاڵییەکان، کۆبوونەوەی فەرمی لەگەڵ وەزارەتی دارایی عێراق دەکات.
• ئامانجەکەى گفتوگۆ و گەیشتنە بە تێگەیشتنێکی هاوبەش و دادپەروەرانە لەسەر پابەندییە دارایی و نەوتییەکان.
•  لێکتێگەیشتن بۆ ماف و شایستە دارایییەکانی هەرێمی کوردستان لە بودجەی گشتیی فیدراڵی بۆ ساڵی 2027.

پێش چوونى شاندەکە دوێنێ فەرمانگەى میدیا و زانیارى لە ڕاگەیێنراوێکدا داوایکرد مووچە و شایستە داراییە بنەڕەتییەکان لە پێوەری خەرجییە ڕاستەقینەکان (الإنفاق الفعلي) و هەر کۆتوبەندێکی دیکە کە ببێتەهۆی دواخستن، ڕاگرتن یان کەمکردنەوەی شایستەکان دوور بخرێنەوە.

داوشیکردبوو لە بودجەی فیدراڵیدا میکانیزمێکی ڕوون و جێگیر بۆ دابینکردن و ناردنی ماف و شایستە دارایییەکانی هەرێمی کوردستان دانرێت.

پێکهاتەى شاندەکە:

• ئومێد سەباح، سەرۆکی دیوانی ئەنجوومەنی وەزیران.
• ئامانج ڕەحیم، سکرتێری ئەنجوومەنی وەزیران.
• عەبدولحەکیم خەسرۆ سەرۆکی فەرمانگەی هەماهەنگی و بەدواداچوون.
• بریکاری وەزارەتی سامانە سروشتییەکان.
•  بەڕێوەبەرانی گشتیی بودجە و ژمێرکاری لە وەزارەتی دارایی و ئابووری.
• نوێنەری وەزارەتی کاروباری پێشمەرگە.

ئاوات شێخ جەناب وەزیرى دارایى کە دەستلەکارکێشانەوەى پێشکەشکردووە یەکەمجارە لەگەڵ ئەم شاندە ناچێتە بەغداد.

دیارترین ناکۆکییەکانى نێوان هەولێر و بەغداد:

هەرێمی کوردستان داوا دەکات، پشکی لە بودجە بە ڕێژەی %14.14 بێت لەسەر بنەمای دوایین سەرژمێری گشتیی کە ئەنجام درا. حکومەتی بەغداد پشکی هەرێمی کوردستانى بە %12.7 دیاری کردووە.

بەغداد داوا دەکات هەرێمى کوردستان ڕۆژانە 400 هەزار بەرمیل ڕادەست بکات، هەرێمى کوردستان بەوە ڕازیی نییە و دەیەوێت 250 یان 280 هەزار بێت.

عێراق دەڵێت داهاتی باج و گومرگ سیادییە و دەبێت بگەڕێتەوە ناوەند، هەرێمى کوردستان دەڵێت سیادی نییە.

پڕۆژە بودجەى گشتیی 2027ـى عێراق گوژمەکەى بە 200 تاوەکو 240 تریلیۆن دینار خەمڵێنراوە و هەرێمى کوردستان داواى نزیکەى 29 تریلیۆن دینارى کردووە بۆ مووچە و پلە بەرزکردنەوەى فەرمانبەران و داواى دامەزراندن و بە هەمیشەییکردنى مامۆستایان و فەرمانبەرانى گرێبەستیشی کردووە.

زانیاریى زیاتر بۆ تۆ:

دیلان غەفوور: هەرێم و بەغداد لەسەر چەند خاڵێکی بودجە نەگەیشتوونەتە ڕێککەوتن