زریانێکی بەهێز ویلایەتەکانی فلۆریدا و ئەلابامای ئەمریکایان گرتەوە

پووختەی هەواڵەکە

بەهۆی دیاردەی ئیڵ نینۆوە زریانی ئیسایاس گەیشتە کەناراوەکانی کەنداوی ئەمریکا
بەهۆی زریانەکەوە 500 هەزار ماڵ لە ئەمریکا کارەبایان بڕاوە
ترەمپ سەبارەت بە زریانەکە: بارودۆخەکە لەژێر کۆنتڕۆڵدایە و مەترسی نییە

لە دوێنێوە زریانێکی بەهێز هەردوو ویلایەتی کەناراویی فلۆریدا و ئەلابامای لە ئەمریکا گرتووەتەوە، زریانی ئیسایاس بە بارانێکی زۆر و بای بەهێزەوە گەیشتووتە کەناراوەکانی کەنداوی ئەمریکا، لە باکووری ڕۆژئاوای فلۆریدا، لە نزیک شاری دێستین، زۆربەی ماڵەکان چۆڵکراون و لە هەردوو ویلایەتەکە کارەبای زیاتر لە 500 هەزار ماڵ بڕاوە، دۆناڵد ترەمپ، سەرۆکی ئەمریکا دەربارەی ئامادەکارییەکان بۆ زریانەکە ڕایگەیاند، بارودۆخەکە لەژێر کۆنتڕۆڵدایە.

مەترسییەکانی دیاردەی ئێڵ نینۆ

ناوەندی نیشتمانیی زریانەکان لە ئەمریکا ڕایگەیاند، ئیسایاس یەکەم زریانی وەرزییە کە لە مانگی حوزەیرانەوە لەناو زەریاوە دەستیپێکردووە، ئەمەش بەهۆی دیاردەی کەشوهەوای مێژوویی ئێل نینۆوە بووە، کە بەشێوەیەکی گشتی هاندەرە بۆ دروستبوونی زریانی گەورەتر لەناو زەریای هێمندا، لە دوای زریانی میڵتۆن، کە ساڵی 2024 ڕوویدا، ئەمە یەکەم زریانە بگات بە وشکانی لە خاکی ئەمریکا.

بای بەهێز دار و بەرد دەبات

لە شاری پێنساکۆلا کە نزیکەی 80 کیلۆمەتر لە ڕۆژئاوای شاری دێستین لە ویلایەتی فلۆریدا دوورە، بای بەهێز سەقفی بەشێک لە ماڵ و شوێنە بازرگانییەکانی هەڵتەکاندووە و بووەتەهۆی کەوتنی درەختەکان، ئەمەش پچڕانی کارەبای زۆربەی ماڵەکانی ئەو ناوچانەی لێکەوتەوە و خزمەتگوزاریی ئاو بۆ ماڵەکان ڕاگیرا.

سەرۆک چاودێریی دۆخەکە دەکات

بەهۆی زریانەکەوە، دۆناڵد ترەمپ، سەرۆکی ئەمریکا سەردانێکی بۆ ویلایەتی ئەلاباما و تەماشاکردنی یاریی تۆپی پێی نێوان کۆلێژەکانی زانکۆکانی جۆرجیا و ئەلاباما هەڵوەشاندەوە.

ترەمپ لە لێدوانێکی ڕۆژنامەوانیدا ڕایگەیاند، ئامادەکاری بۆ زریانەکە کراوە و بارودۆخەکە لەژێر کۆنتڕۆڵدایە، گوتیشی، زۆر لە نزیکەوە چاودێریی دۆخەکە دەکەن.

زانیاریی زیاتر بۆ تۆ

گیانلەدەستدان بەهۆی لافاو و زریانی دیتواوە گەیشتە 900 کەس

توانەوەی سەهۆڵەکانی جەمسەر؛ مەترسییەک بۆ سەر داهاتووی زەوی و ژیانی مرۆڤایەتی