قاسم عەبودی: لە مانگێکدا دۆخی شنگال چارەسەر دەکرێت و بۆشایی کشانەوەی هاوپەیمانانیش پڕ دەکەینەوە

پووختەی هەواڵەکە

ڕاوێژکاری ئاسایشی نیشتمانیی عێراق دەڵێت، لەماوەی مانگێکدا دۆخی شنگال بە شێوەیەکی پلە بەندی چارەسەر دەکرێت.
سەرۆکوەزیران ڕەتیکردەوە هێزى تایبەت لە شنگال هەبێت و تاوەکو ئێستا هەزار و 500 چەکداری شنگال خراونەتە ناو هێزە ئەمنییەکان.
قاسم عەبودى ڕاشیگەیاند، گرفتمان هەیە لەگەڵ هەڵبژاردنی قائیمقامێک بۆ شنگال و دواتریش ئاوەدانکردنەوەی شنگال کێشەی گەورەی هەیە.
لە پاش کشانەوەی هاوپەیمانان هێزە ئەمنییەکان بەفەرمانى سەرۆکوەزیران ڕاسپێدراون بۆ پڕکردنەوەی بۆشاییە ئەمنییەکان.
قاسم عەبودی: بێ گومان توانا و تەکنیکی هاوپەیمانانمان نییە.
عەبودی ڕاشیگەیاند، پێشنیازیان کردووە بۆ دانانی سندوقێک بۆ پاڵپشتی عێراق و سووریا بۆ بەرەنگاربوونەوەی تیرۆر.

قاسم عەبودی، ڕاوێژکاری ئاسایشی نیشتمانیی عێراق، لە پانێڵێکدا لە دیداری مێری تیشکی خستە سەر دۆخی شنگال و ناوەرۆکی ڕێککەوتنی عێراق لەگەڵ هێزەکانی هاوپەیمانان. ناوبراو بە وردی باسی لە ئاڵنگارییە کارگێڕی و بەربەستە ئەمنییەکانی ناوچەی شنگال کرد و ڕوانگە و ڕێگەچەرەکانی حکومەتی عێراقی بۆ چارەسەرکردنی ئەم کێشانە خستە ڕوو. هاوکات لە بەشێکی تری گوتەکانیدا، ئاماژەی بە پرسی کشانەوەی هێزەکانی هاوپەیمانان و بەردەوامیی پرۆسەی بەرەنگاربوونەوەی تیرۆر کرد؛ جەختیشی لەوە کردەوە کە سەرەڕای هەوڵەکان، هێشتا چەکدارانی داعش وەک مەترسییەکی ڕاستەقینە بۆ سەر ئاسایشی عێراق ماونەتەوە.

دۆخی ئەمنی و مامەڵەکردن لەگەڵ گرووپە چەکدارەکان

شنگال دۆسێیەکی ئاڵۆزی خاوەن ڕەهەندی ناوخۆیی و هەرێمییە؛ بەهۆی ڕووداوەکانی ڕابردووەوە هێزی خۆجێی تێدا دروستبووە کە دژایەتی وڵاتانی ناوچەکە دەکەن.
حکومەت گفتوگۆی ڕاشکاوی لەگەڵ گرووپەکانی سەر بە پەکەکە کردووە کە دەبێت چەک تەنیا بەدەستی دەوڵەتەوە بێت، ئەوانیش مەترسی دووبارە هێرشکردنە سەر خۆیان خستووەتەڕوو.
داواکاری چەکداران بۆ مانەوە وەک یەکەی سەربەخۆ لەناو شنگالدا لەلایەن سەرۆکوەزیرانەوە ڕەتکراوەتەوە. لە بەرامبەردا تا ئێستا 1500چەکدار خراونەتە نێو سوپا و هێزە ئەمنییەکان، 1500ی دیکەش ئامادەن، و 500 ژنیش لە یەپەژەوە دەخرێنە ڕیزی پۆلیسی کۆمەڵگەیی.
هەوڵدەدەین کە لەماوەی مانگێکدا دۆخی شنگال چارەسەر بکرێت.

ڕەهەندی هەرێمی و کشانەوەی هێزە بیانییەکان

تورکیا هەمیشە مەترسی لە شاخی شنگال هەیە، چونکە خاڵی بەیەکگەیشتنی سێ وڵاتە.
لە کۆتا سەرداندا داوا لە تورکیا کراوە لە خاکی عێراق بکشێتەوە. تورکیاش قەناعەتی کردووە و بەڵێنیداوە بکشێتەوە، کە سەرەتا لە باشیکەوە دەستپێدەکات.
جەختکراوەتەوە کە بەهەمان شێوەی کشانەوەی هێزەکانی ئەمریکا، دەبێت هیچ هێزێکی بیانی دیکە لە عێراقدا نەمێنێت.

ئاوەدانکردنەوە و دۆخی مرۆیی

کێشە گەورەکە لایەنی ئاوەدانکردنەوەیە، چونکە شارەکە بەتەواوی ڕووخاوە، خزمەتگوزاری و قوتابخانەی تێدا نییە، و 100 هەزار ئاوارەی شنگال هێشتا لە هەرێمی کوردستان نیشتەجێن.
حکومەت پارەی بێشووماری بۆ ئاوەدانکردنەوە تەرخانکردووە، بەڵام پرۆسەکە پێویستی بە کات و هەماهەنگی نێوان حکومەتی هەرێم و بەغداد هەیە.
لە کۆتاییدا هێزە حکومییەکانی وەک پۆلیسی فیدراڵی و حەشدی شەعبی لە شنگال نامێننەوە و دەبێت خەڵکی ناوچەکە خۆیان، خۆیان بەڕێوەبەرن.

کارگێڕی شارەکە و دانانی قائیمقام

پێشنیازی دانانی فەرماندەیەکی سەربازی وەک حاکمی شنگال لەلایەن ڕاوێژکاری ئاسایش و سەرۆکوەزیرانەوە بەتەواوی ڕەتکراوەتەوە.
مۆڵەتی 10 ڕۆژ دراوە بە ئەنجوومەنی پارێزگای نەینەوا بۆ هەڵبژاردنی قائیمقامی شنگال.
دەستوەردانی حزبی هۆکاری سەرەکی کێشەی دانانی قایمقام بووە. جەختکراوەتەوە کە دەبێت قایمقامی نوێ کەسێکی مەدەنی، سەربەخۆ و بەدەر لە ئینتمای حزبی بێت، و داواش لە بەرپرسانی هەرێمی کوردستان کراوە یارمەتیدەر بن لەم پرۆسەیەدا.

هاوکات ڕاوێژکاری ئاسایشی نیشتمانیی عێراق لەبارەی کشانەوەی هاوپەیمانان و بەرەنگاربوونەوەی تیرۆر لە پانێڵەکەیدا ئاماژە بە ناوەرۆکی ڕێککەوتنی عێراق و هاوپەیمانان کرد و تیشکیشی خستە سەر مەترسییەکانی داعش کە بە گوتەی ئەو هێشتا مەترسین بۆ سەر عێراق.

کشانەوەی هاوپەیمانان و ئامادەیی هێزە عێراقییەکان

کشانەوەی هێزەکانی هاوپەیمانان بەشێک بووە لە ڕێککەوتنی نێوان عێراق و ئەمریکا، و لەم چەند ڕۆژەی دوای کشانەوەشیان دۆخی ئەمنی ئارام بووە.
سوپای عێراق هێشتا تەکنەلۆجیا و توانای بەرزی هاوپەیمانانی نییە بۆ بەدواداچوونی جووڵەی تیرۆریستان لە ناوچە دوورە دەستەکاندا.
سەرۆکوەزیران کۆبوونەوەی لەگەڵ هێزە ئەمنییەکان کردووە و پرۆسەی پڕچەککردن و ئامادەکردنی هێزەکان بۆ پڕکردنەوەی ئەو بۆشاییانە دەستیپێکردووە.

کۆنفرانسی هاوکاری عێراق-سووریا و سندوقی پاڵپشتی

لە کۆنفرانسێکی گەورەدا لەسەر بەردەوامی هاوکاری هەواڵگری نێوان عێراق و سووریا بۆ ڕووبەڕووبوونەوەی گرووپە تیرۆریستییەکان جەختکراوەتەوە.
عێراق پێشنیازی دانانی سندوقێکی کردووە بۆ پاڵپشتیکردنی عێراق و سووریا لە شەڕی دژی تیرۆردا، کە ئێستا بیرۆکەکە لەژێر دیراسەکردندایە.

دۆسیەی زیندانیانی داعش و کێشەی چاکسازییەکان

لە کۆنفرانسەکەدا داوا لە عێراق کراوە بەرپرسیارێتی زیندانیکردن، لێکۆڵینەوە و دادگاییکردنی 5000 چەکداری داعش بگرێتە ئەستۆ.
متمانەیەکی باش بە سیستمی دادی عێراق هەیە لە مامەڵەکردن لەگەڵ چەکداران، عێراق خاوەن شارەزاییەکی زۆرە لەم بوارەدا.
عێراق کێشەی لە سەنتەرەکانی چاکسازی (زیندانەکان)دا هەیە کە پڕبوونەتەوە، و پێویستی بە دروستکردنی زیندانی نوێ هەیە.

جوڵەکانی داعش و گرووپە نوێیەکان

داعش لە هەندێک ناوچەدا کە شوێنەکانیان دیاریکراوە خەریکی چالاکبوونەوەیە و شانەی نوستووی هەیە.
جووڵەی هەندێک گرووپی دیکە هەیە کە داعش نین، بەڵام ئەگەر دەرفەتیان بۆ بڕەخسێت، دەبنە دیوێکی دیکەی داعش.
حکومەت و هێزە ئەمنییەکان تەواو ئاگاداری دۆخەکەن، خاوەن ئامێری باشن و ئامادەن بەرپرسیارێتی تەواو بۆ پاراستنی ئاسایش هەڵبگرن.

زانیاریی زیاتر بۆ تۆ

نزار حەیدەر: دوای کشانەوەی هاوپەیمانان پەیوەندییەکانی ئەمریکا و عێراق بەردەوام دەبن

ئەعرەجی: 30ی ئەیلوول وادەی کشانەوەی هاوپەیمانانە نەک کۆکردنەوەی چەک