پووختەى هەواڵەکە:

• ناسەقامگیریی کەشوهەوا ترسى لاى وەزارەتى پێشمەرگە دروستکردووە.
• پایزى ئەمساڵ بە هەورەبروسکە و بارانى پچڕ پچڕ دەستیپێکردووە.
• تاوەکو ئێستا ژمارەیەک پێشمەرگە لە ئەرکدا بریندار بوون.

---

وەزارەتى پێشمەرگە ڕایگەیاند، بە مەبەستی پاراستنی گیانی پێشمەرگەکان و ڕێگریکردن لە ڕووداوی نەخوازراو لە کاتی گۆڕانکارییەکانی کەشوهەوا و بارانی بەلێزمە، کۆمەڵێک ڕێنمایی خێرای خۆپارێزی لە مەترسیەکانی هەورەبروسکە هەیە، داواش لە هێزەکان دەکات لە سەنگەر و بارەگاکاندا بە تەواوی پابەندی بن.

ڕێنماییەکان بۆ ناوچە کراوەکان و سەنگەرەکان:

• مانەوە لە سەنگەر یان شوێنی حەوانەوە، دوورکەوتنەوە لە گرد و ناوچە بەرزەکانی سەرەوەی سەنگەر.
• نەچوونە ژێر داری بەرز و تاک بەتەنیا.
• دوورخستنەوەی چەکەکان، چەتر و هەموو ئامێرە کانزاییەکان لە جەستە، لەگەڵ قەدەغەکردنی تەواوی بەکارهێنانی مۆبایل.

ڕێنماییەکان بۆ ناو سەنگەر و بارەگاکاندا:

• دوورکەوتنەوە لە دەرگای ئاسن، پەنجەرە و ستوونی کانزایی.
• بڕینی کارەبای سەرجەم ئامێرە کارەباییەکان و شاحینەکان.
• ئۆتۆمبێلی سەقف ئاسن بە پەنجەرەی داخراوەوە وەک شوێنێکی پارێزراو هەژمار دەکرێت.

ڕێنماییەکان بۆ کاتی گیرخواردن لە شوێنی کراوەدا:

• چەماندنەوەی سەر لەسەر ئەژنۆ، بەستنی پاژنەی پێکان بەیەکەوە، گرتنی گوێچکەکان بە دەست (درێژبوون و ڕاکشان لەسەر زەوەی هەڵەیە).

یاسای زێڕینی (30 - 30):

• گەڕان بەدوای شوێنی سەلامەتدا ئەگەر ماوەی نێوان بروسکە و دەنگەکەی لە 30 چرکە کەمتر بوو.
• مانەوەوە لە شوێنی سەلامەت بۆ ماوەی لانیکەم 30 خولەک دوای بیستنی دوا دەنگی هەورەبروسکە.

ئەوە لەکاتێکدایە، 16ـى تشرینى یەکەم، دوو پێشمەرگە لە چیای قەرەچووغ لەکاتى ئەرکدا بە هەورەبروسکە برینداربوون و ڕەوانەى نەخۆشخانەى ڕۆژئاوای هەولێر کران، پێشتر و لە ڕۆژى 11ـى تشرینى یەکەمى 2026، بە هەمانشێوە دوو پێشمەرگە لە سنووری پارێزگای مووسڵ بە هەورەبروسکە برینداربوون.

زانیاریى زیاتر بۆ تۆ:

دوو پێشمەرگە بە هەورەبروسکە برینداربوون