د. ڕەوشت جاف، پزیشکی پسپۆڕی نەشتەرگەری ئێسک و شکاوی، سەبارەت بە پەیوەندیی نێوان شەکرە و تەندروستیی ئێسک، دەڵێت:

• نەخۆشیی شەکرە تەنیا کار لەسەر ئاستی شەکری خوێن ناکات، بەڵکو زیانێکی گەورە بە تەندروستیی ئێسک و جومگەکان دەگەیەنێت
• بەرزبوونەوەی شەکر بۆ ماوەیەکی درێژ دەبێتەهۆی پووکانەوەی ئێسک، زیادبوونی مەترسیی شکان و درەنگ چاکبوونەوەی برینەکان، بەتایبەتی لە پێیەکاندا
• تێکچوونی دەمارەکان بەهۆی شەکرەوە وادەکات هەستکردن بە ئازار لە پێیەکاندا کەم ببێتەوە، ئەمەش وادەکات شکانە بچووکەکان یان فشارەکان هەستیان پێ نەکرێت و دۆخەکە بەبێدەنگی خراپتر ببێت
• لاوازیی سووڕی خوێن ڕێگری دەکات لە گەیشتنی ماددە خۆراکییە پێویستەکان بە ئێسکەکان، کە ئەمەش پرۆسەی خۆنوێکردنەوەی ئێسک خاو دەکاتەوە
• زۆر گرنگە تووشبووانی شەکرە بەردەوام چاودێریی ئاستی شەکری خوێنیان بکەن و پشکنین بۆ تەندروستی ئێسک و جومگەکانیان ئەنجام بدەن، بۆ ڕێگریکردن لە ئم ئاڵۆزییانە و پاراستنی توانای جووڵەیان

چەند زانیارییەک لەسەر تەندروستیی ئێسک

• خانمان مەترسیی تووشبوونیان بە نەخۆشییەکانی ئێسک زیاترە
• کەمیی جووڵە و چالاکیی جەستەیی مەترسیی تووشبوون بە نەخۆشییەکانی ئێسک زیاد دەکات
• ئەو کەسانەی پێوانەی کێش و باڵایان لە 19 کەمترە مەترسیی تووشبوونیان بە فشەڵبوونی ئێسک زیاترە
• زۆریی ئاستی هۆڕمۆنەکانی ڕژێنی دەرەقی مەترسیی لاوازبوونی ئێسک زیاد دەکەن

خۆپارێزییەکان بۆ پاراستنی تەندروستیی ئێسک

• ئەنجامدانی چالاکیی جەستەیی
• دوورکەوتنەوە لە خواردنەوە کحولییەکان
• وەرگرتنی بڕی پێویستی ڤیتامین دی لە ژێر چاودێریی پزیشکی پسپۆڕدا
• لە کاتی وەرگرتن و بەکارهێنانی دەرمانەکان بۆ ماوەیەکی درێژ، لەسەر کاریگەرییە نەخوازراوەکانی ڕاوێژ بە پزیشكی پسپۆڕ بکرێت  

زانیاریی زیاتر

بۆ دەستکەوتنی زانیاریی زیاتر سەردانی ئەم لینکەی خوارەوە بکەن  

شەکرە چییە؟ هۆکار و رێگەکانی خۆپاراستن چین؟