پووختەى هەواڵەکە:

• فراكسیۆنی پارتی بەبۆنەی دوو ساڵەی هەڵبژاردنی خوولی شەشەمی پەرلەمانی كوردستان ڕاگەیێنراوێکى بڵاوکردەوە.
• فراکسیۆنى پارتى داواى هەڵبژاردنى دەستەى سەرۆکایەتیى پەرلەمان دەکات.
• فراکسیۆنى پارتى داواش دەکات کاراکردنەوەى پەرلەمان بە پرسى دیکەوە نەبەسترێتەوە.

---

فراكسیۆنی پارتی لە ڕاگەیێنراوەکەدا ئاماژەى بەوەکردووە، دواى دوو ساڵ لە هەڵبژاردن، "بەداخەوە تاوەکو ئێستا پەرلەمانی كوردستان كارا نییە و نەیتوانیوە بە ئەركە یاساییە چاوەڕوان لێكراوەكانی لە سیستەمی حوكمڕانی هەرێمی كوردستاندا هەڵبستێت".

---

فراكسیۆنی پارتی دیموكراتی كوردستان:

• جەخت لەسەر هەڵوێستی نەگۆڕمان لە ڕێزگرتنی بنەماكانی دیموكراسی و كارایی دامەزراوەكان دەكەینەوە.
• دووپاتی دەكەینەوە كە هەمیشە ئامادەی كاراكردنەوەی پەرلەمان و گرێدانی كۆبوونەوەكانی بووین.
• هەمیشەش خاوەن و پشتگیریكاری هەموو هەنگاو و دەستپێشخەرییەك بووین كە بۆ ئەم مەبەستە پێشكەشكراون.
• بانگێشتی سەرجەم فراكسیۆنە بەڕێزەكانی پەرلەمانی كوردستان دەكەین، تاوەکو هەرچی زووە پێكەوە بە ئەركە مێژوویی و یاساییەكەی خۆمان هەڵبستين.
• هەنگاو بنێین بۆ تەواوكردنی ڕێكار و ئەركەكانی دانیشتنی یەكەمی پەرلەمان و هەڵبژاردنی دەستەی سەرۆكایەتییەكەی.
•  وەك سەرەتایەكی گرنگ بۆ كاراكردنەوەی پەرلەمانی كوردستان.
• ئەركی پاراستنی قەوارەی هەرێمی كوردستان و بەرژەوەندییە باڵاكانی، لە ئەستۆی سەرجەم فراكسیۆن و ئەندامانى پەرلەمانە.
• كاراكردنەوەی پەرلەمان نابێت ببەسترێتەوە بە هیچ بەرژەوەندی و ململانێیەكی سیاسیی و حیزبییەوە.

خواستى فراکسیۆنى پارتى

لە كۆتاییدا، فراکسیۆنى پارتى هیوادارە "ئەم دۆخە نالەبارە تێپەڕێت" و بە دیدێكی هاوبەش بۆ پێشخستنی بەرژەوەندییەكانی هەرێمی كوردستان، هەمووان پێكەوە بە كاراكردنەوەی پەرلەمان ڕێز لە ماف و ئیرادەی خەڵكی كوردستان بگرن.

يەکەم دانیشتنی خوولی شەشەمی پەرلەمانی کوردستان لە دووى کانوونی یەکەمی2024 بەڕێوەچوو. پەرلەمانتاران سوێندى دەستبەکاربوونیان خوارد بەڵام دەستەی سەرۆکایەتیی پەرلەمان هەڵنەبژێردرا و دانیشتنەکە بە کراوەیى بەجێهێڵدرا.

زانیاریى زیاتر بۆ تۆ:

34 ساڵ بەسەر یەکەم هەڵبژاردنى پەرلەمانى کوردستان تێدەپەڕێت