داهاتی نانەوتیی سلێمانی لە تەمموزدا بۆ 55.4 ملیار دینار بەرزبووەوە
پووختەی هەواڵەکە:
- داهاتی نانەوتیی سلێمانی زیادیکردووە.
- داهاتی مانگی ڕابردوو بە ڕێژەی 19.8% بەراورد بە مانگی حوزەیران زیادی کردووە.
- زیاتر لە 41 ملیار دیناری کۆی داهاتەکان بە شێوەی کاش بووە.
زانیارییەک گەیشتووەتە کەناڵ8 کە ئاماژە بە هەڵکشانی بەرچاوی جموجۆڵە داراییەکانی سنووری سلێمانی و هەڵەبجە دەکات؛ لە ماوەی تەنیا یەک مانگدا داهاتی نانەوتی بە بڕی 10 ملیار دینار زیادی کردووە، ئەمەش نیشانەی چابوونی پڕۆسەی کۆکردنەوەی داهات و شەفافییەتە لە گەنجینەکاندا کە ئاستی کۆکردنەوەی پارەی بە ڕێژەیەکی پێوانەیی بەرزکردووەتەوە.
پێگەی شەفافییەت و داهاتەکان
- بەگوێرەی ئامارەکانی پێگەی شەفافییەت، داهاتی نانەوتیی سلێمانی، هەڵەبجە و ئیدارە سەربەخۆکان لە تەمموزدا 55 ملیار و 406 ملیۆن دینار بووە.
- داهاتی ئەم مانگە بەراورد بە مانگی حوزەیران (کە 44.4 ملیار بووە) بە ڕێژەی 19.8% زیادی کردووە.
- 41 ملیار و 546 ملیۆن دیناری داهاتەکە بە شێوەی کاش کۆکراوەتەوە و 12.8 ملیار دیناریش بە شێوەی چەک بووە.
- بڕی تەنیا 1 ملیار و 14 ملیۆن دیناری داهاتەکە بە شێوەی مەقاسە (قەرز بە قەرز) ئەژمار کراوە.
ئەم داتایانە ڕۆژانە لە ڕێگەی 828 فەرمانبەرەوە لە 28 وەزارەت، شەش گەنجینە و سەدان بەڕێوەبەرایەتیی جیاوازەوە کۆدەکرێنەوە و تۆمار دەکرێن.
زانیاریی لەسەر بابەتەکە
پێگەی شەفافییەت، کە لە تەمموزی 2022وە بە بڕیاری قوباد تاڵەبانی، جێگری سەرۆکوەزیرانی هەرێمی کوردستان دەستی بەکار کردووە، پڕۆژەیەکی ستراتیژییە بۆ چاودێریکردنی وردی جموجۆڵە داراییەکان و ئاگادارکردنەوەی هاونیشتمانییان لە داهاتە نانەوتییەکان. پڕۆسەکە ڕۆژانە بە شێوەیەکی دیجیتاڵی وردەکاریی گشت داهاتەکان بڵاودەکاتەوە.
زانیاری زیاتر بۆ تۆ
02/08/2026