پووختەی هەواڵەکە

• نرخی بەرمیلێک نەوتی سپی لە بازاڕەکانی هەرێمی کوردستان بۆ 250 هەزار دینار بەرزبووەوە و حکومەتیش تاوەکو ئێستا بڕیاری دابەشکردنی نەوتی پاڵپشتیکراوی نەداوە.

• کێشەی نەبوونی نەوت لە بازاڕ و زۆریی خواست وایکردووە نرخەکان بەرزببنەوە و بەرپرسانی دابەشکردنیش چاوەڕێی گەیشتنی ڕێکار و ڕێنماییە نوێیەکان دەکەن بۆ وەرزی سەرما.

• ساڵی ڕابردوو نەوتی حکومی بە 105 هەزار دینار دابەشکرا، بەڵام ئەمساڵ بەهۆی کەمبوونەوەی بەرهەمهێنان و شەڕی ناوچەکەوە نرخەکان لە بازاڕدا بە ڕێژەیەکی بەرچاو گران بوون.

---

بەگوێرەی زانیارییەک، کە بە کەناڵ8 گەیشتووە، نرخی بەرمیلێک نەوتی سپی لە بازاڕدا گەیشتە 250 هەزار دینار و بەرپرسانی دابەشکردنی نەوتیش دەڵێن، دابەشکردنی نەوتی حکومی تاوەکو مانگی 10 دەستپێناکات و تاوەکو ئێستا هیچ ڕێنماییەک لە حکومەتی هەرێمی کوردستانەوە بۆ دابەشکردنی نەوتی ئەمساڵ دەرنەچووە.

---

هۆکارەکانی گرانبوونی نرخی نەوتی سپی لە بازاڕەکاندا

سەلام عومەر، سەرپەرشتیاری دابەشکردنی نەوتی سپی لە سلێمانی بە کەناڵ8ـی ڕاگەیاند

• هۆکاری سەرەکیی بەرزیی نرخەکە بۆ زۆریی خواست و نەبوونی نەوت لە بازاڕدا دەگەڕێتەوە.

• بەهۆی شەڕی ناوچەکەوە بڕی نەوتی بەردەست کەمیکردووە و خستنەڕووی سووتەمەنی بۆ هاونیشتمانیان بە ڕێژەیەکی بەرچاو کەمبووەتەوە.

• کۆمپانیاکانی بەرهەمهێنان لە کێڵگە نەوتییەکان سوودیان بۆ زیاترکردنی بەرهەمی نەوت بۆ ناوخۆی هەرێمی کوردستان نییە.

جیاوازیی نرخی نەوتی حکومی و نەوتی بازاڕ

حکومەتی عێراق بەرمیلێک نەوتی سپی پاڵپشتیکراو بە تەنیا 30 هەزار دینار بەسەر هاونیشتمانیاندا دابەش دەکات، بەڵام لە هەرێمی کوردستان بەهۆی کەمیی ئەو بڕە نەوتەی لە بەغداوە دەگات، پڕۆسەی دابەشکردن لە ناوەندەکان دوادەکەوێت. ساڵی ڕابردوو هەر خێزانێک بڕی 200 لیتر نەوتی بە 105 هەزار دینار پێدراوە، بەڵام ئەمساڵ هێشتا هیچ بڕیارێکی نوێ بۆ نرخ و کاتی دابەشکردن لەلایەن لایەنە پەیوەندیدارەکانەوە نەدراوە.

زانیاریی زیاتر لەسەر بابەتەکە

لە ئێستادا هاونیشتمانیان لە بازاڕی ئازاددا بەرمیلێک نەوت بە 230 هەزار بۆ 250 هەزار دینار دەکڕن. بەهۆی زۆریی خواست و کێشەی کۆمپانیاکانی بەرهەمهێنان لە کێڵگەکاندا، پڕۆسەی دابەشکردن لە سەنتەری شارەکان ڕووبەڕووی دواکەوتن بووەتەوە. بەرپرسانی دابەشکردنی نەوت لە سلێمانی ئاماژە بەوە دەکەن کە ساڵانە حکومەت لە مانگی 10ـەوە دەست بە دابەشکردنی سووتەمەنی دەکات، بۆیە لە ئێستادا هیچ بڕە نەوتێک بۆ دابەشکردن بەردەست نییە و چاوەڕێی بڕیاری ئەنجوومەنی وەزیران دەکرێت.

زانیاریی زیاتر بۆ تۆ

لە 21 ملیۆن لیتر تەنیا چوار ملیۆن لیتر نەوتی سپی لە بەغدادەوە نێردراوە بۆ سلێمانی

نرخی نەوتی سپی لە بازاڕ لە نێوان 170 بۆ 175 هەزار دیناردایە

کاریگەریی قەیرانی بەنزین؛ شۆفێرێک لەدهۆک تەقە لە بەنزینخانەیەک دەکات