کۆشکی سپی: لێدوانەکەی ترەمپ لەسەر گەرووی هورمز تەنیا گاڵتە بووە
پووختەی هەواڵەکە:
- کۆشکی سپی دەڵێت لێدوانەکەی ترەمپ بۆ لکاندنی گەرووی هورمز بۆ سەر ئەمریکا جیدی نەبووە.
- دۆناڵد ترەمپ ڕایگەیاندووە گەرووەکە لەژێر کۆنتڕۆڵی ئەمریکادایە و بەندەرەکانی ئێرانیان گەمارۆداوە.
- ئێران وەڵامی واشنتن دەداتەوە و جەخت دەکاتەوە کە گەرووی هورمز بە ئێرانی دەمێنێتەوە.
- گرژییە سەربازییەکان بوونەتە هۆی بەرزبوونەوەی نرخی سووتەمەنی و ناسەقامگیری بازاڕی جیهانی.
رۆژنامەی وۆڵ ستریت جۆرناڵ لە زاری بەرپرسێکی کۆشکی سپی، نەیویستووە ناوی ئاشکرا بکرێت، بڵاوی کردەوە کۆشکی سپی هەوڵی هێورکردنەوەی ئەو ئاڵۆزییە دیپلۆماسییە نوێیە دەدات کە بەهۆی قسەکانی دۆناڵد ترەمپەوە لەسەر گەرووی هورمز دروستبووە. بەرپرسانی باڵای ئەمریکا دەڵێن لێدوانەکانی سەرۆک بۆ لکاندنی ئەو ڕێڕەوە ئاوییە جیهانییە بۆ سەر خاکی وڵاتەکەی، تەنها لە چوارچێوەی "گاڵتە"دا بووە و مەبەست لێی ڕاگەیاندنی فەرمی نەبووە.
هەڵوێستی لایەنی ئەمریکی:
- دۆناڵد ترەمپ لە وتارێکدا لە نیویۆرک ڕایگەیاند گەرووی هورمز وەک خاکێکی ئەمریکی ڕادەگەیەنێت.
- جەختی کردەوە کە ئێستا گەرووەکە لەژێر کۆنتڕۆڵی ئەمریکادایە و ڕێگری لە هاتووچۆی کەشتییەکانی ئێران دەکەن.
- بەرپرسێکی کۆشکی سپی ڕایگەیاند ئەم قسانە لە میانی کۆبوونەوەیەک لەگەڵ ئەکادیمیای پۆلیس و بە پێکەنینەوە وتراوە.
هەڵوێستی لایەنی ئێرانی:
لەلایەکی دیکەوە، کازم غەریب ئابادی، جێگری وەزیری دەرەوەی ئێران وەڵامی توندی ترەمپی دایەوە و ڕایگەیاند گەرووی هورمز بە ئێرانی بووە و بە ئێرانیش دەمێنێتەوە. تاران جەخت دەکاتەوە کە داخستن و کردنەوەی ئەم ڕێڕەوە ستراتیژییە تەنها بە فەرمانی ئەوان دەبێت. ئەم کێشەیە لە کاتێکدایە کە لە 28ـی شوباتەوە گرژییە سەربازییەکان لە ناوچەکە زیادیان کردووە و ئەمریکا و ئیسرائیل دەیانەوێت توانای ئەتۆمی و سەربازیی ئێران تێکبشکێنن، ئەوەش بووەتە هۆی بەرزبوونەوەی نرخی سووتەمەنی لە ئاستی جیهاندا.
زانیاری زیاتر بۆ تۆ
دۆناڵد ترەمپ: ئەمریکا دەسەڵاتی تەواوی بەسەر گەرووی هوورمز هەیە
3 کاتژمێر پێش ئێستا