دی ئێن ئۆ بەرهەمهێنانی نەوت لە هەرێمی کوردستان زیاد دەکات

پووختەی هەواڵەکە

کۆمپانیای دی ئێن ئۆی نەرویجی هەوڵەکانی بۆ گەڕاندنەوەی ئاستی بەرهەمهێنانی نەوت لە کێڵگەکانی هەرێمی کوردستان بۆ دۆخی پێشوو چڕکردووەتەوە.

داهاتی کۆمپانیاکە لە چارەکی دووەمی ئەمساڵدا بە ڕێژەی 21% زیادی کردووە و قازانجی کارکردنیشی گەیشتووەتە 439 ملیۆن دۆلار.

بەرهەمهێنانی نەوت لە کێڵگەکانی تاوکێ و پێشابوور دەستیپێکردووەتەوە و کۆمپانیاکە لە ئێستادا سەرقاڵی هەڵکەندنی هەشت بیری نوێی نەوتە.

بەگوێرەی زانیارییەک، کە بە کەناڵ8 گەیشتووە، کۆمپانیای دی ئێن ئۆی نەرویجی بڕیاریداوە ئاستی بەرهەمهێنانی نەوت لە هەرێمی کوردستان بگەڕێنێتەوە بۆ 87 هەزار بەرمیل لە ڕۆژێکدا، دوای ئەوەی لە ماوەی ڕابردوودا بەهۆی گرژییە ئەمنییەکانەوە کارەکانی بەشێوەیەکی کاتی ڕاگرتبوو.

کێڵگەکانی هەرێمی کوردستان و قازانجەکان

کۆمپانیای دی ئێن ئۆ لە 28ـی حوزەیراندا بەرهەمهێنانی نەوتی لە کێڵگەی تاوکێ بەفراوانی دەستپێکردووەتەوە.

کارکردن لە کێڵگەی پێشابوور لە 11ـی تەمموزەوە دەستیپێکردووەتەوە و کۆمپانیاکە سەرقاڵی هەڵکەندنی هەشت بیری نوێیە.

تێکڕای داهاتی کۆمپانیاکە گەیشتووەتە 761 ملیۆن دۆلار و قازانجی پاش خەرجییەکانیش 83 ملیۆن دۆلار بووە.

بەرهەمهێنانی نەوت لە کێڵگەکانی دەریای باکوور و بەرزبوونەوەی نرخ، کاریگەریی وەستانی بەرهەمهێنانی لە هەرێمی کوردستان قەرەبوو کردووەتەوە.

هۆکارەکانی دەستپێکردنەوەی کارەکان

بێژەن موزەفەر ڕەحمانی، سەرۆکی جێبەجێکاری کۆمپانیاکە ئاماژەی بەوە کردووە، بەهۆی سەقامگیربوونی نرخی نەوت و باشتربوونی دۆخی ئاسایشی هەرێمی کوردستان، بڕیاریانداوە کارە مەیدانییەکانیان دەستپێبکەنەوە. پێشتر لە مانگی شوباتی ساڵی ڕابردوو، بەهۆی هێرشەکانی ئەمریکا و ئیسرائیل بۆ سەر ئێران، کۆمپانیاکە وەک ڕێکارێکی خۆپارێزی کارەکانی بەرهەمهێنان و هەڵکەندنی بیرە نوێیەکانی لە کێڵگەی تاوکێ ڕاگرتبوو.

زانیاریی زیاتر لەسەر بابەتەکە

کۆمپانیای دی ئێن ئۆ یەکێکە لە کۆمپانیا نەرویجییەکان کە لە ساڵی 1971 دامەزراوە و لە بوارەکانی گەڕان و پەرەپێدان و بەرهەمهێنانی نەوت و گازدا کاردەکات. ئەم کۆمپانیایە جگە لە هەرێمی کوردستان، مۆڵەتی کارکردنی لە وڵاتانی نەرویج، بەریتانیا، کۆت دیڤوار، هۆڵەندا و یەمەن هەیە. تێکڕای بەرهەمی ڕۆژانەی کۆمپانیاکە لە هەموو کێڵگەکانیدا دەگاتە 88 هەزار و 400 بەرمیل، کە زۆرینەی لە کێڵگەکانی دەریای باکوور بەرهەم دەهێنرێت و لە چارەکی دووەمدا تەنیا 300 بەرمیلی لە هەرێمی کوردستان بووە.

زانیاریی زیاتر بۆ تۆ

عێراق داوای زیاکردنی بەرهەمهێنانی نەوت لە هەرێمی کوردستان دەکات

دی ئێن ئۆ و گەنەڵ ئینێرجی پێشوازی لە رێککەوتنە نەوتییەکە دەکەن

وەزیری نەوت: بەرهەمهێنانى نەوت لە چوار کێڵگەی کەرکووک زیاددەکرێت